दिवसाढवळ्या चोरी, पोलिसांचा धाक राहिला नाही का?, ट्रकमध्ये साहित्य भरले आणि…
मोहने शहाड रोडनजीक जलकुंभाच्या जवळ मोठे पाण्याचे पाईप ठेवले आहेत. हे पाईप दोन ट्रकमध्ये एक क्रेनच्या सहाय्याने भरुन नेत असल्याचा प्रकार जवळच्या नागरिकांच्या लक्षात आला.
ठाणे : केडीएमसी हद्दीत पाणी पुरवठा प्रकल्पांची कामे सुरु आहे. त्यासाठी पाईल लाईन मागविल्या जातात. या पाईपची देखरेख करण्यासाठी महापालिकेनं सुरक्षा रक्षक नेमलेले नाहीत. त्यामुळे शहाड येथील जलकुंभानजीक ठेवलेले तीन टनाचे तीन पाईप चोरी करण्याचा प्रकार उघडकीस आला. मोहने शहाड रोडनजीक जलकुंभाच्या जवळ मोठे पाण्याचे पाईप ठेवले आहेत. हे पाईप दोन ट्रकमध्ये एक क्रेनच्या सहाय्याने भरुन नेत असल्याचा प्रकार जवळच्या नागरिकांच्या लक्षात आले. नागरिकांनी प्रसंगावधान दाखवित हा चोरीचा प्रकार असू शकतो, अशी शंका व्यक्त करत याबाबत पोलिसांना माहिती दिली.
माहिती मिळताच खडकपाडा पोलीस तात्काळ घटनास्थळी पोहचले. वरिष्ठ पोलीस निरीक्षक सज्रेराव पाटील आणि पोलीस निरीक्षक शरद झिने यांनी चौकशी सुरू केली. ट्रकमध्ये पाईप भरुन नेत असलेल्या ट्रक चालकासह क्रेन चालकाला पोलिसांनी विचारणा केली. याची माहिती महानगरपालिकेला दिली. त्यानंतर हा संपूर्ण प्रकरणाचा उघड झाला.
तिन्ही आरोपींना ताब्यात घेतले
महानगरपालिकेने सध्या खडकपाडा पोलीस ठाण्यात गुन्हा दाखल केला. खडकपाडा पोलीस या तिन्ही आरोपींना ताब्यात घेत पुढचा तपास सुरू केला आहे. असे तपास अधिकारी शरद झिने यांनी सांगितलं. कल्याण डोंबिवली महापालिकेचे १७ फूट लांबीचे १४०० मिलीमीटर व्यासाचे ३ टनाचे ३ मोठे पाण्याचे पाईल चोरी करण्याचा प्रकार दिवसाढवळ्या उघडकीस आला आहे.
दोन ट्रक, एक क्रेन चालक ताब्यात
नागरिकांच्या सतर्कतेमुळे ही चोरी उघडकीस आली आहे. या प्रकरणी घटनास्थळी खडकपाडा पोलिसांनी धाव घेत कैलास लक्ष्मण हाकेकर, राजेश धर्मराज यादव, जयराम रामाप्रसाद जैयस्वाल नावाच्या २ ट्रक आणि १ क्रेन चालक ताब्यात घेतले.
चोरी दिवसाढवळ्या केली जात होती. चोरट्यांना पोलिसांचे भय राहिले की नाही असा प्रश्न नागरिकांना पडला आहे. या घटनेत नागरिक सतर्क होते. त्यामुळे चोरट्यांचा डाव उधळून लावण्यात आला. अन्यथा महापालिकेचे साहित्य चोरीला गेले असते. पोलिसांनी योग्य वेळी घटनास्थळ गाठले आणि चोरी उघडकीस आली.
