PHOTOS : 6 महिने उलटूनही मागण्या मान्य नाही, शेतकऱ्यांचा देशभरात एल्गार, महाराष्ट्रातही पडसाद
बुधवारी (26 मे) संयुक्त किसान मोर्चा, किसान सभा, शेतमजूर व कामगार संघटनांच्यावतीने देशभरात काळा दिवस पाळण्यात आला. महाराष्ट्रातही ठिकठिकाणी शेतकरी आणि सामाजिक संघटना निषेध करताना दिसल्या.
मोदी सरकारच्या नव्या कृषी कायद्यांविरोधातील आंदोलनाला 6 महिने पूर्ण झाले तरी केंद्र सरकारने शेतकऱ्यांच्या मागण्या मान्य केल्या नाहीत. त्याविरोधातच निषेध करण्यासाठी बुधवारी (26 मे) संयुक्त किसान मोर्चा, किसान सभा, शेतमजूर व कामगार संघटनांच्यावतीने देशभरात काळा दिवस पाळण्यात आला. महाराष्ट्रातही ठिकठिकाणी शेतकरी आणि सामाजिक संघटना निषेध करताना दिसल्या.
1 / 8
परभणीत काळा दिवस पाळत आंदोलकांनी जिल्हाधिकारी कचेरीसमोर पंतप्रधान नरेंद्र मोदींच्या पुतळ्याचं दहन केलं. लॉकडाऊनमध्ये कामगार शेतकऱ्यांनी जगायचे कसे? शेतकरी विरोधी कायदे कोणाच्या हितासाठी? कामगार विरोधी कायदे कशाला आणि कोणाच्या सांगण्यावरून केले? असे अनेक प्रश्न यावेळी उपस्थितांनी विचारले.
2 / 8
संगमनेरमध्ये सामाजिक कार्यकर्त्या निशा शिवुरकर, शिवाजी गायकवाड आणि त्यांच्या सहकाऱ्यांनी किसान संघर्ष समन्वय समितीच्यावतीने आपल्या घरावर काळे झेंडे लावत कृषी कायदे मागे घेण्याची मागणी केली.
3 / 8
तसेच 6 महिने उलटूनही शेतकऱ्यांच्या मागण्या मान्य न केल्यानं मोदी सरकारचा निषेध करण्यासाठी घरावर काळा झेंडा फडकावल्याची भूमिका त्यांनी मांडली.
4 / 8
यावेळी ज्ञानेश्वर राक्षे आणि कॉ. ज्ञानदेव सहाणे यांनीही आपल्या घरावर काळा झेंडा लावत सरकारचा निषेध केला.
5 / 8
संगमनेरमध्ये छात्रभारती संघटनेच्यावतीने कृषी कायदे रद्द करण्याची मागणी करत पंतप्रधान नरेंद्र मोदी यांचा निषेध नोंदवण्यात आला. तसेच संगमनेर पोलीस स्टेशनला निवेदन देत काळे झेंडे दाखवण्यात आले.
6 / 8
नाशिकमध्ये राष्ट्र सेवा दल, छात्रभारती विद्यार्थी संघटनेच्या कार्यकर्त्यांनी कोरोनाचे नियम पाळून निषेध नोंदवला.
7 / 8
शेतकरी आंदोलनाला 6 महिने पूर्ण होत आहेत. याच दिवशी 26 मे 2014 रोजी नरेंद्र मोदी यांनी पंतप्रधान पदाची शपथ घेतली. त्याला 7 वर्षे पूर्ण होत आहेत. मात्र, सरकार शेतकऱ्यांसोबत चर्चा करत नाही. म्हणून शेतकरी आंदोलनाने आज काळा दिवस म्हणून निषेध दिन पाळण्याचे ठरवल्याची भूमिका उपस्थितांनी मांडली.
