Devendra Fadnavis : एकनाथ शिंदे आजारी, फडणवीसांची दिल्ली वारी! शाह आणि नड्डांच्या भेटीची शक्यता, विस्ताराबाबत काय निर्णय होणार?
उपमुख्यमंत्री देवेंद्र फडणवीस हे तातडीनं नवी दिल्लीत दाखल झालेत. एका खासगी विमानानं ते दिल्लीत दाखल झालेत. आजच सर्वोच्च न्यायालयातील सुनावणी झाली.
नवी दिल्ली : मुख्यमंत्री एकनाथ शिंदे हे आजारी असल्याचं वृत्त दुपारी समोर आलं. डॉक्टरांनी त्यांना आराम करण्याचा सल्ला दिला. सर्वोच्च न्यायालयात (Supreme Court) शिंदे गटातील आमदारांच्या याचिकेवर सुनावणी झाली. ही सुनावणी सर्वोच्च न्यायालयानं पुढं ढकलली आहे. त्यानंतर तासाभरात उपमुख्यमंत्री देवेंद्र फडणवीस हे मुंबईवरून दिल्लीसाठी रवाना झाले. सर्वोच्च न्यायालयाच्या सुनावणीनंतर फडणवीस दिल्लीत विमानतळावर (Delhi Airport) दाखल झालेत. मंत्रिमंडळ विस्ताराबाबत (Cabinet Extension) फडणवीसांची ही दिल्ली वारी आहे का, अशा चर्चांना यामुळं उधाण आलंय. देवेंद्र फडणवीस यांचे सर्व कार्यक्रम रद्द केलेत. फडणवीस भाजपचे राष्ट्रीय अध्यक्ष जेपी नड्डा आणि केंद्रीय गृहमंत्री अमित शहा या नेत्यांना भेटण्याची शक्यता आहे. शिवाय विस्ताराबाबत काही निर्णय होणार का, याकडं सर्वांच लक्ष लागलंय.
खासगी विमानानं दिल्लीत दाखल
उपमुख्यमंत्री देवेंद्र फडणवीस हे तातडीनं नवी दिल्लीत दाखल झालेत. एका खासगी विमानानं ते दिल्लीत दाखल झालेत. आजच सर्वोच्च न्यायालयातील सुनावणी झाली. व्हीआयपी टर्मिनलनं ते दाखल झालेत. त्यानंतर देवेंद्र फडणवीस यांची गाडी विमानतळातून बाहेर निघाली. राज्यातील मंत्रिमंडळ विस्तार पूर्णपणे रखडला आहे. भाजपच्या वरिष्ठ नेत्यांशी त्यांची बैठक होऊ शकते.
एकनाथ शिंदे यांची प्रकृती बरी नाही
आज दुपारी मुख्यमंत्री एकनाथ शिंदे यांची प्रकृती बरी नसल्याचं वृत्त समोर आलं. डॉक्टरांनी त्यांना आराम करण्याचा सल्ला दिला. त्यामुळं देवेंद्र फडणवीस एकटेच दिल्लीला गेले असण्याची शक्यता आहे. मंत्रिमंडळाचा विस्तार रखडला आहे. त्यावर ते दिल्लीतील वरिष्ठ नेत्यांशी बोलण्याची शक्यता आहे. शिवाय सर्वोच्च न्यायालयानं आमदारांच्या अपात्रतेवरील याचिकेवरील सुनावणी पुढं ढकलली आहे. त्यामुळं पुढची रणनीती काय असेल, यावरही चर्चा होण्याची शक्यता आहे.
शरद पवारांच्या घरी दिल्लीत बैठक
एकनाथ शिंदे गटावर टीका करताना प्रियंका चतुर्वेदी म्हणाल्या, शिंदे गट ही शिवसेना नाही तर भाजपा आहे. यापैकी एक जड भाजप तर एक हलकी भाजप आहे. शिवसेना मात्र एकचं असल्याची टीका त्यांनी केली. दुसरीकडं देशाच्या उपराष्ट्रपती पदासाठीच्या निवडणुकीच्या पार्श्वभूमीवर आज दिल्लीत शरद पवार यांच्या घरी विरोधी पक्षांची बैठक होत आहे. या बैठकीत शिवसेनेतर्फे प्रियंका चतुर्वेदी हजेरी लावत आहेत. मार्गारेट अल्वा या यूपीएच्या उपराष्ट्रपतीपदाच्या उमेदवार आहेत.
