राज्यसभा निवडणुकीत घोडेबाजाराला सुरुवात? एमआयएमच्या आमदारांचा मोठा दावा, भाजपकडून ऑफर?
एमआयएमचे धुळे शहर विधानसभा मतदारसंघ आमदार फारुख शाह यांनी खळबळजनक दावा केला आहे. भाजपकडून घोडेबाजार सुरू झाल्याचं त्यांनी म्हटलंय. तसंच आपल्याला ऑफरही आल्याचं त्यांचं म्हणणं आहे.
मुंबई : राज्यसभेच्या सहा जागांसाठी निवडणूक (Rajyasabha Election) होतेय. पण सध्याचं विधिमंडळातील संख्याबळ पाहता सहाव्या जागेसाठी घोडेबाजार होण्याची चिन्ह आहेत. “आम्ही घोडेबाजार करणार नाही”, असा दावा महाविकास आघाडी आणि भाजप दोघांकडून केला जातोय. पण अश्यात एमआयएमचे धुळे शहर विधानसभा मतदारसंघ आमदार फारुख शाह (Farooq Shah) यांनी खळबळजनक दावा केला आहे. भाजपकडून (BJP) घोडेबाजार सुरू झाल्याचं त्यांनी म्हटलंय. तसंच आपल्याला ऑफरही आल्याचं त्यांचं म्हणणं आहे.
भाजपची ऑफर, एमआयएमचा दावा
राज्यसभेच्या सहाव्या जागेसाठी घोडेबाजार सुरू असल्याचा दावा एमआयएमचे आमदार फारुख शाह यांनी केला आहे. आपल्याला महाविकास आघाडी आणि भाजप दोघांकडूनही ऑफर असल्याचं फारुख शाह यांनी म्हटलंय. “काहीजणांचे फोन येत आहेत, तर काहीजण भेटायला येत आहेत. पण जोपर्यंत आमचे अध्यक्ष आदेश देत नाही तोवर आम्ही काहीही भूमिका घेणार नाही”, असं त्यांनी सांगितलं आहे.
‘…तर आघाडीला पाठिंबा देऊ’
“भाजपला पाठिंबा देण्याचा प्रश्नच नाही. जर आमच्या अध्यक्षांनी ठरवलं की आम्हाला महाविकास आघाडीला मतदान करायचंय तर त्याप्रमाणे आपण मतदान करू. पण तसे आदेश आणखी देण्यात आलेले नाहीत”, असं फारुख शाह यांनी म्हटलंय. शिवाय “सरकार स्थापनेच्या वेळीदेखील आम्हाला ऑफर आली होती पण पक्षाचे अध्यक्ष असदुद्दीन ओवैसी यांनी तेव्हा तटस्थ राहण्याची भूमिका घेतली. त्यामुळे आम्ही तटस्थ राहिलो”, असं त्यांनी सांगितलं.
‘महाविकास आघाडीचाच उमेदवार निवडून येणार’
फारुख शाह यांनी सहावी जागा कुणाची असणार यावर भाष्य केलंय. “भाजपने कितीही प्रयत्न केले तरी त्यांची तिसरी जागा निवडून येऊ शकत नाही. सहावी जागा ही महाविकास आघाडीचीच असेल”, असंही शाह म्हणाले आहेत.
