Sanjay Raut : संजय राऊत मुंबईत दाखल, शिवसेनेकडून राऊतांचं जंगी स्वागत, सोमय्यांविरोधात आक्रमक
शिवसेना खासदार संजय राऊत आज मुंबईत दाखल झाले आहेत. त्यांच्या स्वागताला हजारो शिवसैनिक मुंबई विमानतळावर दाखल झाले आहेत. ईडीने कारवाई केल्यानंतर राऊत पहिल्यांदाच मुंबईत येत असल्याने सेनेकडून त्यांचं जंगी स्वागत करण्यात आलंय.
मुंबई : शिवसेना खासदार संजय राऊत (Sanjay Raut) आज मुंबईत दाखल झाले आहेत. त्यांच्या स्वागताला हजारो शिवसैनिक (Shivsena) मुंबई विमानतळावर दाखल झाले आहेत. ईडीने कारवाई केल्यानंतर राऊत पहिल्यांदाच मुंबईत येत असल्याने सेनेकडून त्यांचं जंगी स्वागत करण्यात आलंय. तर भाजप नेते किरीट सोमय्या (Kirit Somaiya) यांच्याविरोधात जोरदार घोषणाबाजी करण्यात आलीय. संजय राऊतांच्या फोटोसह पोस्टरबाजी करताना शिवसैनिक दिसून आले. विमानतळ ते भांडुप रॅली काढून शिवसेना जोरदार शक्तिप्रदर्शन करत आहे. दोन दिवसांपूर्वीच संजय राऊतांची संपत्ती ईडीकडून जप्त करण्यात आली आहे. त्यानंतर जोरदार वातावरण तापलं होतं. त्यानंतर शिवसेनेकडून हे जोरदार शक्तिप्रदर्शन करण्यात आलं आहे. बुधवारीच शरद पवारांनी भेट मोदींची भेट घेत संजय राऊतांवरील ईडीने केलेल्या कारवाईची तक्रार केली होती.
शिवसेनेकडून जंगी स्वागत
बुधवारीच संजय राऊत अनेक आरोप करत किरीट सोमय्या यांना पुन्हा एकदा मीडियासमोर शिवीगाळ करताना दिसून आले होते. त्यानंतर आज शिवसैनिकांकडून ही स्वागताची तयारी करण्यात आली होती. संजय राऊत विमानतळावर पोहोचण्याच्या आगोदरच मोठ्या संख्येने शिवसैनिक विमानतळावर दाखल झाले होते. संजय राऊत विमानतळावर दाखल होताच संजय राऊतांवर जोरदार पुष्पवृष्टी करण्यात आली. यावेळी शिवसैनिकांच्या हातात योद्धे असे फलक संजय राऊत यांच्या फोटोसह दिसून आले. त्यानंतर शिवसेनेची ही रॅली निघाली. शिवसेनेच्या शक्तिप्रदर्शनावर भाजप नेत्यांनी मात्र सडकून टीका केली आहे.
भाजप नेत्यांची स्वागतावर सडकून टीका
शिवसेना खासदार संजय राऊत याचं स्वागत करणे हे चुकीचे आहे. गुंड गजा मारणे जेलमधून सुटल्यानंतर त्याची मिरवणूक निघाली होती. मग त्याला स्वागत म्हणायचं का? त्यामुळे सर्वसामान्य माणसाला हे पटणारं नाही, अशी प्रतिक्रिया भाजप नेते सुधीर मुनगंटीवर यांनी दिली आहे. तर संजय राऊत हे घाबरलेले आहेत. त्यांचं मानसिक आरोग्य बिघडलं आहे. त्यांना उपचाराची गरज आहे, अशी प्रतिक्रिया भाजप नेते अतुल भातखळकर यांनी दिली आहे. गलिच्छ भाषा वापरणारे संजय राऊत त्यांचं असे स्वागत होणे म्हणजे हा आपल्या संस्कृतीचा अपमान आहे. राऊतांच्या स्वागताला भगवे झेंडे लावले त्याविरोधात त्याच्यावर कारवाई करावी अशी मागणीही अतुल भातखळकर यांनी केली आहे. संजय राऊतांनी देशद्रोह्यांची भूमिका उचलून धरली तरी त्यांना पाठिंबा मिळतोय. त्यामुळे उद्या जर उद्धव ठाकरे देशाचे पंतप्रधान झाले तर भ्रष्टाचारविरोधी कायदाच रद्द करून टाकतील, अशीही प्रतिक्रिया भातखळकरांनी दिली आहे.
Vasant More Mns : मला फक्त मोदींचाच फोन यायचा बाकी, सेंटीमेंटल वसंत मोरेंना कुणाकुणाची खुली ऑफर?
