Eknath Shinde : पालघर जिल्ह्यात उद्धव ठाकरे यांच्या शिवसेनेला खिंडार, 50 शिवसेना पदाधिकारी एकनाथ शिंदे गटात सामील
महाराष्ट्रातील शिवसेनेच्या अनेक कार्यकर्त्यांनी शिंदे गटात जाण्याची तयारी केली आहे. कारण रोज नव्याने प्रवेश होत असल्याचे जाहीरपणे दिसत आहे. मीरा भाईदरचे अनेक नगरसेवक शिंदे गटात सामील झाले आहेत.
मुंबई – एकनाथ शिंदे (Eknath Shinde) यांनी बंड केल्यापासून शिवसेनेतील (Shivsena) अनेक नेते कार्यकर्ते रोज शिंदे गटात सामील होत आहेत. मागच्या अनेक दिवसांपासून शिंदे गटात जोरदार भरती सुरु आहे. बंड केलेले आमदार आपले शक्ती प्रदर्शन प्रत्येक जिल्ह्यात करीत आहेत. त्यामुळे शिवसेनेसाठी ही मोठी डोकेदुखी ठरण्याची शक्यता आहे. कारण पालिकेची निवडणूक काही दिवसांवर आली आहे. त्या निवडणुकीत फुटीचे नक्की पडसाद पाहायला मिळतील. काल रात्री उशिरा पालघरचे शिवसेना खासदार राजेंद्र गावित (Rajendra Gavit), वसई तालुका प्रमुख निलेश तेंडुलकर, उपजिल्हाप्रमुख नवीन दुबे, वसई तालुका उपप्रमुख तथा माजी नगरसेविका यांचे पती दिवाकर सिंग, बविआतील काही महिन्यांपूर्वी शिवसेनेत दाखल झालेले वसई विरार चे माजी स्थायी समिती सभापती सुदेश चौधरी यांच्यासह 50 शिवसेना पदाधिकारी एकनाथ शिंदे गटात सामील झाले आहेत. काल त्यांनी महाराष्ट्राचे मुख्यमंत्री एकनाथ शिंदे यांची भेट घेऊन समर्थन दर्शविलं.
मीरा भाईदरचे अनेक नगरसेवक शिंदे गटात सामील
महाराष्ट्रातील शिवसेनेच्या अनेक कार्यकर्त्यांनी शिंदे गटात जाण्याची तयारी केली आहे. कारण रोज नव्याने प्रवेश होत असल्याचे जाहीरपणे दिसत आहे. मीरा भाईदरचे अनेक नगरसेवक शिंदे गटात सामील झाले आहेत. त्यांनी प्रताप सरनाईक यांच्या मार्गदर्शनाखाली शिंदे गटात प्रवेश केल्याची माहिती मिळाली आहे. पालघर जिल्ह्यात उद्धव ठाकरे, आदित्य ठाकरे, संजय राऊत यांच्यासह अनेक नेत्यांना कबर कसायला लागणार आहे. कारण काही महिन्यात पालिकेच्या निवडणुका होणार आहेत. त्यावेळी तिथं शिवसेनेला सगळी तयारी नव्याने करावी लागणार आहे.
राजेंद्र जंजाळ यांची शिवसेनेतून हकालपट्टी
युवासेना उपसचिव राजेंद्र जंजाळ यांची शिवसेनेतून हकालपट्टी करण्यात आली आहे. शिवसेनेचे माजी खासदार चंद्रकांत खैरे यांनी तशी माहिती जाहीर केली आहे. युवासेनेचे उपसचिव राजेंद्र जंजाळ यांनी पक्षाच्या विरुद्ध काम केल्याने त्यांची शिवसेनेतून हकलपट्टी करण्यात आल्याची माहिती दिली आहे. हकालपट्टीची घोषणा शिवसेनेचे माजी खासदार चंद्रकांत खैरे यांनी युवा सेनेच्या निष्ठा मेळाव्यात केली. राजेंद्र जंजाळ यांनी शिवसेनेच्या बंडखोर गटाला समर्थन दिल्याने हकालपट्टी करण्यात आली आहे.
