WTC Final 2023 आधी टीम इंडियाच टेन्शन थोडं कमी झालं, एक चांगली बातमी

मुंबई : इंडियन प्रीमियर लीग सुरु असताना BCCI च्या डोळ्यासमोर वर्ल्ड टेस्ट चॅम्पियनशिप आहे. WTC फायनलसाठी खेळाडूंना फिट ठेवण्यावर बीसीसीआयचा भर आहे. त्यामुळे आयपीएलमध्ये खेळणाऱ्या भारतीय खेळाडूंवर बीसीसीआयच बारीक लक्ष आहे. येत्या 7 ते 13 जून दरम्यान इंग्लंडच्या केनिंग्टन ओव्हल मैदानात भारत-ऑस्ट्रेलियामध्ये वर्ल्ड टेस्ट चॅम्पियनशिपची फायनल रंगणार आहे. टीम इंडियाला मागच्या काही वर्षात आयसीसी ट्रॉफी जिंकता आलेली नाही. त्यामुळे यंदा वर्ल्ड टेस्ट चॅम्पियशिप जिंकण्याचा टीम इंडियाचा प्रयत्न असेल.

WTC फायनलसाठी आधीच टीम सुद्धा निवडण्यात आली आहे. 23-24 मे पर्यंत हेड कोच राहुल द्रविड आणि काही खेळाडू WTC फायनलच्या तयारीसाठी इंग्लंडला रवाना होऊ शकतात.

दोघे फिट

दरम्यान WTC फायनलआधी टीम इंडियासाठी एक चांगली बातमी आहे. दुखापतग्रस्त खेळाडूंपैकी दोघे फिट आहेत. उमेश यादव आणि शार्दुल ठाकूर WTC फायनलसाठी उपलब्ध असणार आहेत. उमेशला हॅमस्ट्रिंगची दुखापत झालीय. दुखापत फार गंभीर नाहीय. बीसीसीआयची मेडीकल टीम कोलकाता नाइट रायडर्स मेडीकल टीमच्या संपर्कात आहे. त्यांच उमशेच्या दुखापतीवर लक्ष आहे.

तर 23 मे रोजी, दुसऱ्या खेळाडूची निवड

दुसऱ्या बाजूला शार्दुल ठाकूर देखील फिट झाला आहे. त्यामुळे टीम इंडियाची चिंता थोडी कमी झाली आहे. दुसऱ्याबाजूला बीसीसीआय जयदेव उनाडकटबाबत थोडी वाट पाहणार आहे. जर तो दुखापतीमधून सावरला नाही, तर 23 मे रोजी त्याच्याजागी दुसऱ्या खेळाडूची निवड जाहीर करण्यात येईल.

अख्ख्या सीजनमधून बाहेर

जयदेव उनाडकटला खांद्याची दुखापत झालीय. तो आयपीएल 2023 च्या अख्ख्या सीजनमधून बाहेर गेलाय. WTC फायनलसाठी आता महिना बाकी आहे. सिलेक्टर्स जयदेव उनाडकटच्या जागी दुसऱ्या खेळाडूच नाव जाहीर करण्याची घाई करणार नाहीत. NCA केकेआरचे बॉलिंग कोच भारत अरुण यांच्या संपर्कात आहे. ते 2021 T20 वर्ल्ड कपपर्यंत भारताचे बॉलिंग कोच होते.