आयपीएल 2025 स्पर्धेपूर्वी गुजरात टायटन्सने डाव टाकला, आशिष नेहराबाबत घेतला मोठा निर्णय

आयपीएल 2025 स्पर्धेपूर्वी मेगा लिलाव पार पडणार आहे. या स्पर्धेपूर्वी फ्रेंचायझींनी आपल्या संघाची बांधणी सुरु केली आहे. राजस्थान रॉयल्सने मुख्य प्रशिक्षकाची जबाबदारी राहुल द्रविडच्या खांद्यावर दिली आहे. तर पंजाब किंग्सने रिकी पॉन्टिंगवर विश्वास टाकला आहे. तसेच लखनौ सुपर जायंट्स झहीर खानवर डाव लावला आहे. असं असताना गुजरात टायटन्सच्या गोटातही बरंच काही शिजताना दिसत आहे. जानेवारी 2022 मध्ये गुजरात टायटन्सने आशिष नेहराची संघाच्या मुख्य प्रशिक्षकपदी निवड केली होती. त्याच्या मार्गदर्शनाखाली गुजरात टायटन्सने चांगली कामगिरी केली आहे. पहिल्याच फटक्यात जेतेपदावर नाव कोरलं होतं. तर दुसऱ्यांदा अंतिम फेरी गाठली होती. आयपीएल 2022 मध्ये राजस्थान रॉयल्सचा पराभव करून जेतेपद मिळवलं होतं. तसेच चेन्नई सुपर किंग्सकडून पराभव झाल्याने आयपीएल 2023 मध्ये उपविजेतेपदावर समाधान मानावं लागलं. मात्र आयपीएल 2024 स्पर्धेत संघाची कामगिरी सुमार राहिली. गुजरात टायटन्सने 14 पैकी 7 सामन्यात पराभव, 5 सामन्यात विजय, तर दोन सामने पावसामुळे झाले नाहीत. असं असातना सलग चौथ्या वर्षी आशिष नेहरा संघासोबत असेल की नाही याबाबत चर्चा रंगली आहे.

क्रिकबझच्या रिपोर्टनुसार, आशिष नेहरा आयपीएल 2025 स्पर्धेतही गुजरात टायटन्सचा मुख्य प्रशिक्षक असणार आहे. इतकंच काय तर विक्रम सोलंकीही संघासोबत कायम असणार आहेत. म्हणजेच या पर्वात संघाच्या सपोर्ट स्टाफमध्ये काही बदल होणार नाही. आशीष कपूर, मिथुन मनहास, नरेंद्र नेगी आणि नईम अमीन संघासोबत कायम राहतील. पण गॅरी कर्स्टनची जागा कोण घेणार हे अद्याप स्पष्ट नाही. गॅरी कर्स्टनने सध्या पाकिस्तान संघाच्या मर्यादीत षटकाच्या संघाचा प्रशिक्षक आहे. गॅरी कर्स्टन मागच्या तीन पर्वात गुजरातचा फलंदाज प्रशिक्षक होता आणि मार्गदर्शक म्हणून काम केलं होतं.

दरम्यान, आयपीएल 2025 स्पर्धेपूर्वी मेगा लिलाव पार पडणार आहे. या स्पर्धेपूर्वी किती खेळाडू रिटेन करायचे हा प्रश्न सोडवायचा आहे. दुसरीकडे, हार्दिक पांड्याला ट्रेड विंडोच्या माध्यमातून विकल्यानंतर गेल्या पर्वात सर्वच गणित बिघडलं. कर्णधारपदाची धुरा शुबमन गिलच्या खांद्यावर आली. मात्र त्याच्या नेतृत्वात काही खास करता आलं नाही. गुजरात टायटन्सला आठव्या स्थानावर समाधान मानावं लागलं.