IPL 2020 : फ्रँचायझींनी तब्बल 11 कोटी मोजले, मात्र स्फोटक फलंदाजाकडून निराशा, 9 सामन्यात केवळ 58 धावा
धडाकेबाज फलंदाजाने आयपीएलच्या 13 व्या मोसमात निराशाजनक कामगिरी केली आहे.
दुबई : आयपीएल (IPL 2020 ) स्पर्धा म्हणजे फटकेबाजी, लांबच लांब सिक्सर, थरार आणि रोमांच. या स्पर्धेत अनेक खेळाडूंकडून फटकेबाजी पाहायला मिळते. यंदाच्या 13 व्या मोसमातही आतापर्यंत अशीच फटकेबाजी पाहायला मिळाली आहे. किंग्जस इलेव्हन पंजाबच्या फ्रँचायझीने मोठी रक्कम मोजून ग्लेन मॅक्सवेल या हार्ड हीटर फलंदाजाचा आपल्या गोटात समावेश केला. मात्र त्याला आपल्या संघासाठी पैसा वसूल कामगिरी करता आलेली नाही. IPL 2020 KXIP Glenn Maxwelll Bad Performance
किंग्जस इलेव्हन पंजाबने 2 सामन्यात सलग विजय मिळवत स्पर्धेत पुनरागमन केलं. मात्र आक्रमक फलंदाज ग्लेन मॅक्सवेलला सूर गवसलेला नाही. मॅक्सवेलसाठी पंजाबच्या फ्रँचायझीने 10 कोटी 75 लाख रुपये मोजले आहेत. मात्र मॅक्सवेलला त्या मोबदल्यात पैसावसूल कामगिरी करता आलेली नाही. त्यामुळे मॅक्सवेलचा आता फ्लॉप फलंदाजांच्या यादीत समावेश झाला आहे. मॅक्सवेलने यंदाच्या मोसमात आतापर्यंत 9 सामने खेळले आहे. या 9 सामन्यातून 8 डावात त्याने बॅटिंग केली आहे. यामध्ये त्याने केवळ 58 धावाच केल्या आहेत. मॅक्सवेलची यंदाच्या मोसमातील नाबाद 13 सर्वोच्च धावसंख्या राहिली आहे. विशेष म्हणजे मॅक्सवेलला या 8 डावात एकही सिक्स लगावता आला नाही. यावरुन मॅक्सवेलच्या सुमार खेळीचा अंदाज येतो.
ग्रॅमी स्वान हैराण
निराशाजनक कामिगिरीनंतरही ग्लेन मॅक्सवेलला पंजाबच्या प्लेइंग इलेव्हनमध्ये वारंवार स्थान दिले जात आहे. यावरुन इंग्लंडचा माजी फिरकीपटू ग्रॅमी स्वान याने काही दिवसांपूर्वी हैराणी व्यक्त केली होती. “मॅक्सवेल हा स्टार खेळाडू आहे. मॅक्सवेलसाठी पंजाबने मोठी रक्कम मोजली आहे. मात्र त्यानुसार त्याला कामगिरी करता आली नाही. मॅक्सवेलने इंग्लंडविरुद्ध दमदार कामगिरी केली होती. तशीच कामगिरी त्याने आयपीएलमध्ये करावी”, असं स्वान काही दिवसांपूर्वी एका कार्यक्रमात म्हणाला होता.
मॅक्सवेलची आयपीएल कारकिर्द
मॅक्सवेलने आतापर्यंत आयपीएलमध्ये 78 सामने खेळले आहेत. या 78 सामन्यात त्याने 156 च्या स्ट्राईक रेटने 1 हजार 455 धावा केल्या आहेत. यामध्ये 6 अर्धशतकांचा समावेश आहे. 95 ही त्याची सर्वोच्च धावसंख्या आहे. मॅक्सवेलने पंजाबसाठी 2014 मध्ये तडाखेदार खेळी केली होती. मॅक्सवेलने तेव्हा 187 च्या स्ट्राईक रेटने 16 सामन्यात 552 धावा केल्या होत्या.
पंजाबने यंदाच्या मोसमात आतापर्यंत एकूण 9 सामने खेळले आहेत. या 9 सामन्यांपैकी केवळ 3 सामन्यात पंजाबला विजय मिळवता आला आहे. दरम्यान पंजाब आज (20 ऑक्टोबर) दिल्लीविरुद्ध भिडणार आहे. प्लेऑफच्या शर्यतीतले आव्हान कायम राखण्यासाठी पंजाबसाठी विजय मिळवणे अत्यावश्यक असणार आहे.
संबंधित बातम्या :
PHOTO | निराशाजनक कामगिरीनंतरही मॅक्सवेलला संधी, इंग्लंडचा माजी खेळाडू हैराण
IPL 2020 KXIP Glenn Maxwelll Bad Performance
