Rupees : रुपयाचं डॉलरसमोर लोटांगण, रुपया एवढा दचकला कशामुळे?

नवी दिल्ली : डॉलरच्या (Dollar) तुलनेत रुपयाची पुन्हा घसरगुंडी उडाली. 22 सप्टेंबर 2022 रोजी गडग़डण्यात रुपयाने नवा रेकॉर्ड (All Time Low) तयार केला. सुरुवाती व्यापारी सत्रात रुपया (Rupees) 51 पैशांच्या घसरणीसह 80.47 वर स्थिरावला. सततच्या व्याजदर वाढीचा हा परिणाम समजण्यात येत आहे.

अमेरिकन केंद्रीय फेडरल रिझर्व्ह बँकेने तिसऱ्यांदा व्याजदरात वाढ केली. त्याचा फायदा डॉलरला झाला. त्यामुळे डॉलर मजबूत झाला. तर भारतीय रुपयाला त्याचा फटका बसला. रुपया निच्चांकी स्तरावर घसरला.

गुरुवारी सुरुवातीच्या व्यापारी सत्रात रुपया डॉलरच्या तुलनेत 80.27 होता. त्यानंतर अचानक त्याला घेरी आली. तो गडगडला. सुरुवातीच्या सत्रातच रुपया 80.47 पर्यंत गडगडला. हा आतापर्यंतचा सर्वात निच्चांकी स्तर आहे.

बुधवारी रुपया मजबूत स्थिती होता. डॉलरच्या तुलनेत रुपया 79.96 स्तरावर बंद झाला. कालच्या व्यापारी सत्रात रुपया चांगल्या स्थितीत होता. तो 79.79 स्तरावर व्यापार करत होता. 20 जुलै रोजी डॉलरच्या तुलनेत रुपया घसरुन 80.05 वर पोहचला होता. त्यानंतर रुपया सावरला होता.

डॉलर इंडेक्स सध्या मजबूत पातळीवर आहे. त्यामुळे भारतीय रुपया आणि अन्य आशियातील चलन कमकूवत दिसत आहेत. डॉलर च्या तुलनेत यूरो पण गेल्या 20 वर्षांतील निच्चांकी स्तरावर म्हणजे 0.9822 वर पोहचला आहे.

जर वेळीच उपाय योजना केल्या नाहीत तर रुपयाची घसरगुंडी सुरुच राहिल. तज्ज्ञांच्या मते, रुपयाची अवस्था पाहता, तो लवकरच 81 ते 82 असा नवा रेकॉर्ड करु शकतो.

अमेरिकन बँकेने व्याजदरात 0.75% टक्के वृद्धी केली आहे. त्यामुळे महागाई आटोक्यात येईल असे मानण्यात येत आहे. आता रुपयाची घसरण थांबवण्यासाठी RBI काय पाऊल टाकते हे पाहणे महत्वाचे ठरेल.