असं काय घडलं की, नांदेडमध्ये अज्ञात तरूणांनी पेटवली बस अन्…

नांदेड, १३ सप्टेंबर २०२३ | परभणी जिल्ह्यातील वसमतहून ४७ प्रवासी घेऊन बस नांदेडकडे येत होती. रात्री उशीरा कासारखेडा पुलाजवळ बस आल्यावर २० ते २५ युवकांनी बसवर जोरदार दगडफेक केल्याची घटना घडली. या बसमध्ये प्रवाशी असतानाही अज्ञात तरूणांकडून ही दगडफेक करण्यात आली. तर दगडफेक सुरू झाल्याची घटना घडताच प्रवासी घाबरलेल्या अवस्थेत बसमधून खाली उतरले. अज्ञात तरूणांनी दगडफेकच केली नाही तर बसमधून प्रवासी खाली उतरल्यानंतर तरूणांनी एसटी बस पेट्रोल टाकून पेटवली. बस पेटवल्यानंतर या अज्ञात हल्लेखोरांनी घटनास्थळावरून पळ काढला. या घटनेवेळी अज्ञात तरूणांनी एक मराठा लाख मराठा अशा घोषणा दिल्या, अशी माहिती या बसच्या वाहकाकडून देण्यात आली. या घटनेमुळे हा प्रकार घडलेल्या परिसरात एकच खळबळ उडाली आहे. दरम्यान, ही बस पेटवणारे अज्ञात तरूण कोण आहेत? ते कुठून आले होते? याची माहिती अद्याप समोर आली नाही. तर या हल्ल्याची जबाबदारी कोणत्याही संघटनेकडून घेण्यात आलेली नाही.