एसटीची धडक बसली, दुचाकीचा बॅलन्स गेला! मागे बसलेली आई एसटीच्या चाकाखाली आली आणि जागीच….
Pune Accident News : सध्या चिंचवडे नगर इथं राहणारी आणि मूळची आर्वी येथील असलेली 58 वर्षीय महिला शारदा निवृत्ती भोर आपल्या मुलासह बाईकवरुन चालली होती. त्यावेळी एसटी बसच्या चाकाखाली आल्याने महिला जागीच ठार झाली. पण, मुलगा अगदी थोडक्यात बचावला.
पुणे : पुणे नाशिक महामार्गावर (Pune Nashik Highway) कळंब इथं भीषण अपघात (Kalamb Accident) झाला. एसटी बस आणि दुचाकीच्या झालेल्या अपघातात एका महिलेचा जागीच मृत्यू झाला. मुलगा आणि आई एकत्र दुचाकीवर जात होते. त्यावेळी ही दुर्दैवी घटना घडली. या अपघातातून मुलगा अगदी थोडक्यात बचावला आहे. या अपघातामुळे महामार्गावर मोठा वाहतूक कोंडी झाली होती. शारदा निवृत्ती भोर (Sharada Nivrutti Bhor) असं अपघातात मृत्यू झालेल्या महिलेचं नाव आहे.
आणि एसटीचं चाक डोक्यावर गेलं!
पुणे नाशिक महामार्गावरील कळंब गावच्या हद्दीत वर्पेमळ इथं रविवारी सकाळी हा अपघात घडला. सकाळी साडेअकरा वाजण्याच्या सुमारास ही दुर्दैवी घटना घडली. सध्या चिंचवडे नगर इथं राहणारी आणि मूळची आर्वी येथील असलेली 58 वर्षीय महिला शारदा निवृत्ती भोर आपल्या मुलासह बाईकवरुन चालली होती. त्यावेळी एसटी बसच्या चाकाखाली आल्याने महिला जागीच ठार झाली. पण, मुलगा अगदी थोडक्यात बचावला. आईच्या जागीच झालेल्या मृत्यूने मुलावर दुःखाचा डोंगर कोसळला आहे. तर भोर कुटुंबीयांनाही मोठा धक्का बसलाय.
मयूर निवृत्ती भोर हे आपल्या आईला घेऊन गावी निघाले होते. मामा प्रभाकर दत्तात्रय वाईकर यांच्याकडे हिवरे इथं जात असतेवेळी त्यांच्या आईवर काळाने घाला घातला. मंचर पोलिसांनी या अपघाताबाबत अधिक माहिती दिली आहे.
नेमका कसा घडला अपघात?
मयूर भोर हे मामाच्या घरी हिरवे इथं आईसोबत जायला निघाले होते. त्या दरम्यान, पुणे-नारायण गाव ही एसटीही जात होती. पुणे नाशिक महामार्गावरुन जात असताना कळंब गावच्या हद्दीत त्यांच्या बाईकच्या हॅन्डलला या एसटी बसने धडक दिली. एसटी उजव्या बाजूने भरधाव वेगाने जात होती. त्यावेळी एसटीचा धक्का बसल्यानं दुचाकीवरील तोल गेला आणि दुचाकीवर मागे बसलेल्या शारदा निवृत्ती भोर या एसटीच्या मागच्या चाकाखाली येऊन चिरडल्या गेल्या. डोक्यावर एसटीचं चाक गेल्यामुळे त्यांचा जागीच मृत्यू झाला.
या अपघातप्रकरणी चालकाविरोधात गुन्हा दाखल करण्यात आलाय. मंचर पोलिसांनी याप्रकरणी फिर्याद नोंदवली असून पुढील तपास केला जातो आहे. या अपघातामुळे राज्यातील रस्ते अपघातांचा प्रश्न दिवसेंदिवस गंभीर बनत चालल्याचं अधोरेखित झालंय. या अपघातामुळे महामार्गावर वाहतूक कोंडी झाली होती. त्यानंतर पोलिसांनी धाव घेत या संपूर्ण अपघाताचा तपास केला आणि वाहतूक पूर्ववत करण्यास प्रयत्न केले.
