महाराष्ट्र विधानसभा निवडणूक 2024 शेड्यूल

महाराष्ट्र विधानसभा निवडणुकीचं बिगुल वाजलं आहे. राज्यातील 288 जागांवर एका टप्प्यात मतदान होणार आहे. 20 नोव्हेंबर रोजी मतदान होणार असून 23 नोव्हेंबर रोजी मतमोजणी होऊन निकाल लागणार आहे. राज्यात बहुमतासाठी 145 जागांची गरज आहे. त्यामुळे हा आकडा महायुती गाठणार की महाविकास आघाडी हे पाहणं औत्सुक्याचं ठरणार आहे. 

महायुतीत तीन पक्ष आहेत. भाजप, एकनाथ शिंदे यांच्या नेतृत्वातील शिवसेना आणि अजित पवार यांच्या अध्यक्षतेखालील राष्ट्रवादी. तर महाविकास आघाडीतही तीन पक्ष आहेत. एक म्हणजे काँग्रेस, उद्धव ठाकरे यांच्या नेतृत्वाखालील शिवसेना आणि शरद पवार यांच्या नेतृत्वाखालील राष्ट्रवादी. या दोन्ही आघाड्यांना काही छोट्या राजकीय पक्षांनी पाठिंबा दिलेला आहे. दोन्ही आघाड्या मजबूत स्थितीत आहे. महायुती राज्यात सत्तेत आहे. तर महाविकास आघाडी प्रमुख विरोधी पक्ष आहे. त्यामुळे या निवडणुकीतील लढत अत्यंत तुल्यबळ ठरणार आहे. 

राज्यात गेल्या पाच वर्षात दोन मोठी बंड झाली. एक म्हणजे एकनाथ शिंदे हे शिवसेनेतून बाहेर पडले. तर दुसरे म्हणजे अजित पवार हे राष्ट्रवादीतून बाहेर पडले. एकनाथ शिंदे हे शिवसेनेचे अध्यक्ष आहेत. तर उद्धव ठाकरे हे शिवसेना उद्धव बाळासाहेब ठाकरे या पक्षाचे प्रमुख आहेत. अजित पवार हे राष्ट्रवादीचे तर शरद पवार हे राष्ट्रवादी शरदचंद्र पवार या पक्षाचे अध्यक्ष आहेत. फुटीनंतर विधानसभा निवडणुकीत पहिल्यांदाच ठाकरे विरुद्ध शिंदे आणि अजितदादा विरुद्ध शरद पवार असा सामना पाहायला मिळणार आहे. 

राज्यात 9 कोटी 63 लाख 69 हजार 410 मतदार आहेत. त्याशिवाय 1 लाख 16 हजार 355 सर्व्हिस वोटर आहेत. निवडणूक आयोगाच्या आकडेवारीनुसार राज्यात 4.97 कोटी पुरुष मतदार आहेत. तर 4.66 कोटी महिला मतदार आहेत. राज्यात पहिल्यांदाच 20.93 लाख नवीन मतदार मतदान करणार आहेत. 

असा आहे निवडणूक कार्यक्रम

महाराष्ट्र विधानसभा निवडणुकीसाठी 22 ऑक्टोबर रोजी अधिसूचना जारी करण्यात आली. 29 ऑक्टोबर ही अर्ज भरण्याची शेवटची तारीख आहे. 30 ऑक्टोबर रोजी अर्जांची छाननी होणार आहे. तर 4 ऑक्टोबरपर्यंत अर्ज मागे घेता येणार आहे. येत्या 20 नोव्हेंबर रोजी मतदान होणार असून 23 नोव्हेंबर रोजी मतमोजणी होणार असून त्याच दिवशी निकाल लागणार आहे. त्यानंतर काही दिवसातच राज्यात नवीन सरकार स्थापन होणार आहे.