अमित शाह यांची गोंदियातली उद्याची सभा तडकाफडकी रद्द, नेमकं कारण काय?
केंद्रीय गृहमंत्री अमित शाह यांची गोंदियातली नियोजित उद्याची सभा रद्द करण्यात आली आहे. आता ही सभा पुढच्या आठवड्यात होण्याची शक्यता आहे. अमित शाह यांची गोंदियाची सभा आता गुढीपाडव्यानंतरच होण्याची शक्यता आहे.
![अमित शाह यांची गोंदियातली उद्याची सभा तडकाफडकी रद्द, नेमकं कारण काय? अमित शाह यांची गोंदियातली उद्याची सभा तडकाफडकी रद्द, नेमकं कारण काय?](https://images.tv9marathi.com/wp-content/uploads/2024/03/amit-shah-6.jpg?w=1280)
केंद्रीय गृहमंत्री अमित शाह यांची उद्या गोंदियात सभा आयोजित करण्यात आलीय. महायुतीचे लोकसभेचे उमेदवार सुनील मेंढे यांच्या प्रचारासाठी केंद्रीय गृहमंत्री अमित शाह यांची गोंदियात जाहीर सभा आयोजित करण्यात आली होती. या सभेची जय्यत तयारी पूर्ण झाली होती. पण ऐनवेळी ही सभा रद्द करण्यात आली आहे. त्यामुळे अनेकांच्या भुवया उंचावल्या आहेत. नेमकं कोणत्या कारणास्तव ही सभा रद्द झाली? असा प्रश्न उपस्थित केला जात होता. यामागील कारणही समोर आलं आहे. अमित शाह यांची प्रकृती बिघडली असल्याची माहिती मिळत आहे. लोकसभा निवडणुकीसाठी सातत्याने बैठका आणि दौरे सुरु असल्यामुळे कदाचित अमित शाह यांना थकवा जाणवत असू शकतो.
मिळालेल्या माहितीनुसार, अमित शाह प्रकृतीच्या कारणास्तव गोंदियाच्या सभेला उपस्थित राहू शकणार नाहीत. त्यामुळे त्यांची उद्याची गोंदिया येथील सभा रद्द करण्यात आली आहे. पुढील सभेचं नियोजन हे 12 किंवा 13 एप्रिलला राहणार असल्याची माहिती प्रदेश प्रवक्ते विश्वास पाठक यांनी प्रसार माध्यमांना दिली आहे.
मोदींची चंद्रपुरात सभा
अमित शाह उद्या विदर्भाच्या दौऱ्यावर येणार होते. पण त्यांचा हा दौरा पुढे ढकलण्यात आला आहे. अमित शाह यांच्या प्रकृतीच्या कारणास्तव त्यांचा दौरा पुढे ढकलण्यात आला आहे. अमित शाह यांची उद्याची सभा रद्द करण्यात आली आहे. असं असलं तरी विदर्भात पंतप्रधान नरेंद्र मोदी यांची सभा होणार आहे. नरेंद्र मोदी येत्या 8 एप्रिलला चंद्रपूरच्या दौऱ्यावर येणार आहेत. त्यांची चंद्रपुरात जाहीर सभा होणार आहे. चंद्रपूर-वणी-आर्णी लोकसभा मतदारसंघाचे महायुतीचे उमेदवार सुधीर मुनगंटीवार यांच्या प्रचारासाठी येत्या 8 एप्रिलला नरेंद्र मोदी यांची मोरवा येथे सायंकाळी 4 वाजता सभा आयोजित करण्यात आली आहे.