Gadar 2 | अमीषा पटेलने शेअर केला ‘गदर 2’चा स्पॉइलर; भडकलेले चाहते म्हणाले ‘आता क्लायमॅक्स पण सांगून टाक’

मुंबई : जवळपास 22 वर्षांनंतर अभिनेता सनी देओल आणि अमीषा पटेल हे ‘गदर 2’ या चित्रपटातून पुन्हा एकदा प्रेक्षकांच्या भेटीला येणार आहेत. ‘गदर’ या चित्रपटाचा हा सीक्वेल आहे. गेल्या दोन दशकांपासून प्रेक्षक या सीक्वेलची प्रतीक्षा करत होते. अखेर येत्या 11 ऑगस्ट रोजी ‘गदर 2’ प्रदर्शित होणार आहे. काही दिवसांपूर्वीच त्याचा टीझर आणि आता त्यातील गाणी सोशल मीडियावर प्रदर्शित केली जात आहेत. यादरम्यान अमीषा पटेलने असं काही केलं, जे पाहून प्रेक्षक फार नाराज झाले आहेत.

अमीषा पटेलने नेमकं काय केलं?

अमीषाने ‘गदर 2’ या चित्रपटातील एका सीनबद्दल मोठा खुलासा केला आहे. या चित्रपटाचा टीझर जेव्हा प्रदर्शित झाला होता, तेव्हा त्यात तारा सिंग हा एका मृतदेहाजवळ बसून रडताना दिसून येतो. हा सीन पाहिल्यानंतर चाहत्यांनी असा अंदाज लावला की सीक्वेलमध्ये सकीना या व्यक्तिरेखेचा मृत्यू होतो. चित्रपटाच्या याच महत्त्वाच्या सीनबद्दल अमीषाने हा खुलासा केला आहे. नेटकऱ्यांनी जेव्हा असा अंदाज वर्तवला की चित्रपटात सकीनाचा मृत्यू होतो, तेव्हा अमीषाने ट्विटरवर त्या सीनचा फोटो शेअर केला. या सीनसोबतच तिने माहिती दिली की चित्रपटात सकीनाचा मृत्यू होत नाही. ‘गदर 2’ या चित्रपटातील हा खूप मोठा स्पॉइलर आहे. यावरूनच नेटकऱ्यांनी तिला ट्रोल करण्यास सुरुवात केली.

अमीषाच्या या ट्विटनंतर चाहत्यांनी तीव्र संताप व्यक्त केला आहे. ‘तू चित्रपटाचे स्पॉइलर्स का देत आहेस’, असा सवाल एकाने केला. तर ‘क्लायमॅक्स पण सांगून टाक. म्हणजे आम्ही चित्रपट थिएटरमध्ये पहायला जाणारच नाही’, अशी उपरोधिक कमेंट दुसऱ्याने केली. ‘तू हे चुकीचं करतेय, अशा पद्धतीने स्पॉइलर देऊन काय होणार’, असंही नेटकऱ्यांनी म्हटलंय.

Hey all my lovely fans!! Too many of u have been concerned n worried with this shot from GADAR 2 thinking it’s SAKINA who is dead !! Well it’s not !! Who it is I can’t say but it’s not SAKINA !! So pls don’t WORRY !! ???love u all pic.twitter.com/5OLl3ikpZv

— ameesha patel (@ameesha_patel) June 30, 2023

अमीषाने तिच्या ट्विटमध्ये लिहिलं, ‘माझे सर्व चाहते, तुमच्यापैकी बरेच जण हा विचार करून निराश होत आहेत की गदर 2 मध्ये सकीनाचा मृत्यू होणार आहे. पण तुम्ही असा विचार करू नका. कारण असं काहीच होणार नाही. तारा सिंग कोणाच्या मृतदेहाजवळ बसला होता, हे तर मी तुम्हाला सांगू शकत नाही, पण इतकं नक्कीच सांगू शकते की ती सकीना नाही. त्यामुळे तुम्ही निराश होऊ नका. लव्ह यू ऑल.’