Ileana D’Cruz | अखेर इलियानाने पोस्ट केला मिस्ट्री मॅनसोबतचा फोटो; कोण आहे होणाऱ्या बाळाचा पिता?
इलियाना सध्या चित्रपटांपासून दूर आहे. मात्र खासगी आयुष्यामुळे तिने नेटकऱ्यांचं लक्ष वेधलं आहे. कतरिनाच्या भावाला मुंबईत आणि राजस्थानमध्ये त्याच्या बहिणीच्या लग्नात पाहिलं गेलं होतं. इलियानाला तो गेल्या सहा महिन्यांपासून डेट करत असल्याचं म्हटलं जातंय.
मुंबई : अभिनेत्री इलियाना डिक्रूझने एप्रिल महिन्यात गरोदर असल्याचं जाहीर करत सर्वांना सुखद धक्का दिला. मात्र बाळाचा होणारा पिता कोण आहे, या प्रश्नाचं उत्तर अद्याप चाहत्यांना मिळालेलं नाही. प्रेग्नन्सी जाहीर केल्यापासून इलियाना सोशल मीडियावर तिचे बरेच फोटो पोस्ट करतेय. नुकतेच तिने बेबीमूनचे फोटो सोशल मीडियावर पोस्ट केले असून त्यात पहिल्यांदा इलियानाचा मिस्ट्री मॅन पहायला मिळाला आहे. डिनर डेटचा हा फोटो पोस्ट असून इलियानाचा बॉयफ्रेंड असल्याचा अंदाज नेटकरी वर्तवत आहेत.
इलियानाने बॉयफ्रेंडचा हात आपल्या हातात घेतल्याचा फोटो पोस्ट केला आहे. या फोटोच्या कॅप्शनमध्ये तिने लिहिलंय ‘माझी रोमान्सची कल्पना. त्याला शांतपणे जेवू देत नाहीये.’ यामध्ये इलियनाच्या हातावर डायमंड रिंगसुद्धा पहायला मिळतेय. मात्र तिचा हा बॉयफ्रेंड कोण आहे यावरून अद्याप पडदा उचलण्यात आला नाही.
18 एप्रिल रोजी लहान बाळाच्या ड्रेसचा फोटो तिने इन्स्टाग्रामवर पोस्ट केला होता. ‘.. आणि प्रवासाला सुरुवात’ असा मजकूर त्या ड्रेसवर लिहिलेला होता. तर आणखी एका फोटोमध्ये इलियानाच्या गळ्यात एक पेंडंट पहायला मिळालं होतं. ‘मम्मा’ अशा अक्षरांचा तो पेंडंट होता. हे दोन्ही फोटो पोस्ट करत इलियानाने कॅप्शनमध्ये ‘लवकरच..’ असं लिहिलं होतं.
गेल्या काही दिवसांपासून इलियाना ही अभिनेत्री कतरिना कैफचा भाऊ सेबॅस्टियन लॉरेंट मिशेलला डेट करत असल्याची चर्चा होती. विकी कौशल आणि कतरिना कैफ यांच्यासोबत हे दोघं पार्टी करतानाही दिसले होते. त्यामुळे बाळाचा होणारा पिता हा सेबॅस्टियन तर नाही ना, असाही सवाल काही नेटकऱ्यांनी केला आहे.
इलियाना बरीच वर्षे अँड्र्यू नीबोन या ऑस्ट्रेलियन फोटोग्राफरला डेट करत होती. हे दोघं लग्न करणार अशीही चर्चा होती. मात्र 2019 मध्ये त्यांचा ब्रेकअप झाला. त्यानंतर इलियानाचं नाव कतरिनाच्या भावाशी जोडलं गेलं. मात्र या दोघांनी सोशल मीडियावर किंवा माध्यमांसमोर कधीच त्याची कबुली दिली नाही.
इलियाना सध्या चित्रपटांपासून दूर आहे. मात्र खासगी आयुष्यामुळे तिने नेटकऱ्यांचं लक्ष वेधलं आहे. कतरिनाच्या भावाला मुंबईत आणि राजस्थानमध्ये त्याच्या बहिणीच्या लग्नात पाहिलं गेलं होतं. इलियानाला तो गेल्या सहा महिन्यांपासून डेट करत असल्याचं म्हटलं जातंय. इलियानाने कतरिनाच्या वाढदिवसाच्या सेलिब्रेशनचा एक फोटो पोस्ट केला होता. ज्यामध्ये विकी कौशल, कतरिना कैफ, इलियाना, सेबॅस्टिनय, इसाबेल कैफ, आनंद तिवारी आणि मिनी माथुर पहायला मिळाले होते.
