‘इमली’ फेम अभिनेत्रीचा अपघात; ट्रकने कारला नेलं फरपटत, असा वाचला जीव
शूटिंगवरून घरी परतताना प्रसिद्धी टीव्ही अभिनेत्रीला अपघात; ट्रकने कारला दिली धडक अन..
मुंबई: स्टार प्लस वाहिनीवरील ‘इमली’ या लोकप्रिय मालिकेत भूमिका साकारणारी अभिनेत्री हेतल यादव हिचा नुकताच अपघात झाला. रविवारी रात्री शूटिंग संपल्यानंतर घरी परतताना हेतलच्या कारला एका ट्रकने धडक दिली. सुदैवाने या अपघातात हेतलला कोणतीही दुखापत झाली नाही. अपघाताच्या वेळी हेतल स्वत: कार चालवत होती. ‘इमली’ या मालिकेत हेतल सध्या शिवानी राणा ही भूमिका साकारतेय.
“मी रात्री पावणे नऊच्या सुमारास सेटवर पॅकअप केलं. त्यानंतर फिल्म सिटीमधून घरी निघाली. मी स्वत:च कार चालवत होती. JVLR हायवेवर पोहोचले तेव्हा एका ट्रकने माझ्या कारला मागून धडक दिली आणि धक्का मारत कारला हायवेच्या किनाऱ्यापर्यंत आणलं. माझी कार खाली पडणारच होती, तितक्यात मी धाडस करून कशीबशी कार थांबवली आणि मुलाला कॉल केला”, असा धक्कादायक अनुभव हेतलने सांगितला.
View this post on Instagram
“मुलाला कॉल करून मी त्याला पोलिसांना या अपघाताविषयी माहिती देण्यास सांगितलं. कारण मी काही बोलण्याच्या मनस्थितीतच नव्हते. सुदैवाने मला कोणतीही दुखापत झाली नाही. मात्र जे काही घडलं, त्यातून मी अजून सावरू शकले नाही”, असं ती पुढे म्हणाली.
हेतल गेल्या 25 वर्षांपासून अभिनयक्षेत्रात सक्रीय आहे. तिने ‘तारक मेहता का उल्टा चष्मा’ या लोकप्रिय मालिकेत ज्वालाची भूमिका साकारली होती. याच भूमिकेमुळे तिला खूप लोकप्रियता मिळाली. सध्या ती ‘इमली’ या मालिकेतून प्रेक्षकांच्या भेटीला येतेय.
