‘तुझा प्रायव्हेट व्हिडीओ लीक करू’; भाजप प्रवेशच्या चर्चांदरम्यान ‘मख्खी’ फेम अभिनेत्याला धमकी
51 वर्षीय किच्चा सुदीप आतापर्यंत राजकारणापासून दूर राहिला आहे. मात्र भाजपात प्रवेश केल्यानंतर तो केवळ राज्यातच नाही तर राज्याबाहेरही पक्षाचा मोठ्या प्रमाणावर प्रचार करणार असल्याचं म्हटलं जातंय.
बेंगळुरू : ‘मख्खी’ फेम कन्नड अभिनेता किच्चा सुदीप लवकरच भाजपमध्ये प्रवेश करणार असल्याची जोरदार चर्चा आहे. या चर्चांदरम्यान त्याला धमकी मिळाल्याची माहिती समोर येत आहे. किच्चा सुदीप आणि त्याचा मॅनेजर जॅक मंजूला धमकीचं पत्र मिळालं आहे. या पत्रानंतर त्याने पुत्तनहल्ली पोलीस ठाण्यात तक्रार दाखल केली आहे. तुझा प्रायव्हेट व्हिडीओ लीक करू, अशी धमकी या पत्रातून सुदीपला देण्यात आली आहे. सुदीपचा जवळचा मित्र आणि त्याचा मॅनेजर जॅक मंजूने पोलिसांत तक्रार दाखल केली आहे.
प्रायव्हेट व्हिडीओ लीक करण्याची धमकी
एएनआयने दिलेल्या वृत्तानुसार, किच्चा सुदीपच्या मॅनेजरला सोशल मीडियावर त्याचा प्रायव्हेट व्हिडीओ लीक करण्याची धमकी देणारं पत्र मिळालं आहे. यानंतर त्याने बेंगळुरूच्या पीएस पुत्तनहल्ली पोलीस ठाण्यात तक्रार दाखल केली. पोलिसांनी या तक्रारीच्या आधारे आयपीसीच्या कलम 120 बी, 506 आणि 504 अंतर्गत एफआयआर दाखल केली आहे. याप्रकरणी पोलिसांचा पुढील तपास सुरू आहे.
Karnataka | FIR registered under sections 120B, 506 and 504 IPC at PS Puttenahalli, Bengaluru after Kannada actor Kiccha Sudeep’s manager received a letter threatening to release his private video on social media. Police investigation underway
— ANI (@ANI) April 5, 2023
भाजप प्रवेशची चर्चा
गेल्या काही दिवसांपासून किच्चा सुदीपच्या भाजप प्रवेशच्या चर्चांनी जोर धरला आहे. कर्नाटक विधानसभा निवडणुकीच्या काही दिवस आधी तो भाजपात प्रवेश करण्याची शक्यता आहे. पक्षात प्रवेश केल्यानंतर निवडणुकीसाठी तो मोठं कॅम्पेन करणार असल्याचंही म्हटलं जात आहे. राज्यात भाजपने बऱ्याच कन्नड कलाकारांकडे यासाठी विनंती केल्याचं समजतंय. पुढच्या महिन्यात निवडणुकीचा प्रचार सुरू होईल. त्यामुळे पक्षाकडून ही जोरदार तयारी सुरू असल्याचं कळतंय. मात्र याबद्दल अद्याप किच्चा सुदीपकडून कोणतीच अधिकृत घोषणा झालेली नाही.
51 वर्षीय किच्चा सुदीप आतापर्यंत राजकारणापासून दूर राहिला आहे. मात्र भाजपात प्रवेश केल्यानंतर तो केवळ राज्यातच नाही तर राज्याबाहेरही पक्षाचा मोठ्या प्रमाणावर प्रचार करणार असल्याचं म्हटलं जातंय. किच्चा सुदीपचे ‘विक्रांत रोना’ आणि ‘कब्जा’ हे चित्रपट नुकतेच प्रेक्षकांच्या भेटीला आले. ‘विक्रांत रोना’ या त्याच्या चित्रपटाला प्रेक्षक-समिक्षकांकडून दमदार प्रतिसाद मिळाला.
किच्चा सुदीपचा काल्पनिक अ‍ॅक्शन चित्रपट विक्रांत रोना या चित्रपटाची कथा ही एका रहस्यमय घटनेभोवती फिरणारी आहे, ज्यामध्ये मुख्य भूमिकेत दिसणारा किच्चा सुदीप हा प्रेक्षकांच्या पसंतीस उतरला होता. थ्रीडी फॉरमॅटमध्ये बनलेल्या या चित्रपटाने पहिल्याच दिवशी कलेक्शनचा शानदार आकडा पार करून प्रेक्षकांना थिएटर्सच्या खुर्चीला खिळवून ठेवलं होतं. या चित्रपटाने पहिल्या दिवशी 33 ते 35 कोटींची कमाई केली होती. त्यानंतर रिलीजच्या चौथ्या दिवशी या चित्रपटाने 100 कोटींचा आकडा गाठला होता.
