Video: राज ठाकरेंच्या आवाजात महागर्जना; ‘हर हर महादेव’चा टीझर पहायलाच हवा!

हर हर महादेव… मराठी मनाला चेतवणारी, रक्त सळसळवणारी गर्जना! सह्याद्रीच्या कडेकपाऱ्यातून, सिंधुदुर्गाच्या लाटांमधून, देवगिरीच्या अभेद्य भिंतीमधून ते अटकेपार फडकवणाऱ्या भगव्या ध्वजापर्यंत जिथे जिथे छत्रपती शिवाजी महाराजांच्या मराठा साम्राज्याची मोहोर उमटली तिथे तिथे या गर्जनेने आसमंत दणाणून सोडला. या गर्जनेशिवाय मराठ्यांचा इतिहास पूर्णच होऊ शकत नाही. छत्रपती शिवरायांच्या प्रत्येक लढाईत ही गर्जना म्हणजे लढण्याचं बळ देणारी जणू उर्जाच होती. झी स्टुडिओजच्या ‘हर हर महादेव’ (Har Har Mahadev) या चित्रपटातून हीच ऊर्जा आता परत एकदा अनुभवायला मिळणार आहे. अभिजित देशपांडे लिखित- दिग्दर्शित (Abhijeet Deshpande), झी स्टुडिओज आणि गणेश मार्केटिंग फिल्म्स निर्मित ‘हर हर महादेव’ हा चित्रपट दिवाळीच्या मुहूर्तावर प्रेक्षकांच्या भेटीला येणार आहे. या चित्रपटाचा टीझर नुकताच प्रदर्शित झाला आहे. (Marathi Movie)

महाराष्ट्र नवनिर्माण सेनेचे प्रमुख राज ठाकरे यांच्या धीरगंभीर आवाजातील हा टीझर आहे. “जेव्हा मायमाऊलीची बेअब्रू आणि मंदिराला तडा गुन्हा नव्हता, जेव्हा सह्याद्रीला कणा आणि मराठीला बाणा नव्हता. ही ३५० वर्षानंतरच्या पहाटफुटीची गोष्ट आहे. ही अठरापगड आरोळ्यांची आणि माझ्या छत्रपतींच्या शिवगर्जनेची गोष्ट आहे..हर हर महादेव,” अशी राज ठाकरेंच्या आवाजातील वाक्यं या टीझरमध्ये ऐकायला मिळतात.

झी स्टुडीओजच्या हर हर महादेव सिनेमासाठी राज ठाकरेंचा आवाज @RajThackeray @ZeeStudios_ pic.twitter.com/xXWgbr5lcj

— TV9 Marathi (@TV9Marathi) March 4, 2022

आजवर झी स्टुडिओजने एकाहून एक दर्जेदार कलाकृती प्रेक्षकांच्या भेटीला आणल्या आहेत. याच पंक्तीत आता ‘हर हर महादेव’ हे आणखी एक नाव सहभागी होणार आहे. नुकतंच महाराष्ट्र राज्य सरकारने काही निवडक शहरांमध्ये चित्रपटगृहे पूर्ण क्षमतेने सुरू होणार असल्याची महत्त्वाची घोषणा केली. याच घोषणेचं औचित्य साधून प्रेक्षकांचा आनंद द्विगुणित करण्यासाठी ‘हर हर महादेव’ या चित्रपटाचा टीझर प्रेक्षकांच्या भेटीस आणला आहे.

हेही वाचा:

नागराजमुळे त्या पठ्ठ्याचं आयुष्यच बदललं; 20 वर्षीय मुलाचं स्वप्न साकार

‘अमिताभ बोलतो का रे सेटवर, समोरच्याला घाबरवत असेल ना तो’; किशोर कदम म्हणतात..

‘झुंड’च्या ट्रेलरमध्ये लक्ष वेधणारी ‘भावना भाभी’ आहे तरी कोण?