Prashant Damle : ‘मला मुख्यमंत्री झाल्यासारखं वाटतंय, कारण..’ – प्रशांत दामले

पिंपरी चिंचवड | 6 डिसेंबर 2024 : अखिल भारतीय नाट्य संमेलन नाट्य दिंडीला मोठ्या उत्साहात सुरुवात झाली आहे. नाट्य संमेलन नाट्य दिंडीत अनेक मराठी कलाकारांसह पिंपरी चिंचवडकरांनी देखील मोठ्या उत्साहात सहभाग नोंदवला आहे. सध्या सर्वत्र फक्त आणि फक्त भारतीय नाट्य संमेलन नाट्य दिंडीची चर्चा सुरु आहे. महाराष्ट्राचे मुख्यमंत्री एकनाथ शिंदे, राष्ट्रवादी काँग्रेसचे अध्यक्ष शरद पवार आणि राज्याचे उद्योगमंत्री उदय सामंत देखील याठिकाणी उपस्थित आहे. दरम्यान, नाट्य संमेलनाचे पहिल्यांदाच अध्यक्षपद मिळाल्यानंतर अभिनेते प्रशांत दामले यांनी त्यांची प्रतिक्रिया व्यक्त केली आहे.

नाट्य संमेलनाचे पहिल्यांदाच अध्यक्षपद मिळाल्याने मला मुख्यमंत्री झाल्यासारखं वाटतंय… असं वक्तव्य प्रशांत दामले यांनी केलं आहे. ‘आम्ही कलाकार मंडळी तीन तास नाटक करतो. पण 365 दिवस 24 तास अभिनय करणारी ही मंडळी मंचावर आहेत. त्यांच्या कार्याला नक्कीच सलाम. मात्र मला या नाट्य संमेलनाचे पहिल्यांदाच अध्यक्षपद मिळाल्याने मला मुख्यमंत्री झाल्यासारखं वाटतंय.’

‘शासनाने दिलेला निधी योग्यरीत्या आपण वापरायला हवा. शासनाने आम्हाला योग्य त्या उपाययोजना पुरवाव्यात. रसिक प्रेक्षकांनी पुढच्या पिढीत नाटकाचा गोडवा निर्माण करावा…’ असं देखील प्रशांत दामले म्हणले. एवढंच नाही तर, प्रशांत दामले यांनी येणाऱ्या अडणचणी देखील सरकार पुढे मांडल्या आहेत.

प्रशांत दामले म्हणाले, ‘मुख्यमंत्री साहेब नाट्यगृह बांधणं आणि ती सांभाळणे सोपं आहे. अलीकडेच सांस्कृतिक मंत्री म्हणाले की आम्ही 70 नाट्यगृह बांधणार आहोत, हे ऐकून आम्ही कलाकार मंडळी आनंदी झालोय. पण आहे ती नाट्यगृह योग्यरीत्या मेंटेन ठेवायला हवीत. नाट्यगृहाचे दर, लाईट बिल, सुविधांची वानवा आहे. त्याकडे सरकारने लक्षं द्यावं.’ सध्या सर्वत्र फक्त आणि फक्त प्रशांत दामले यांच्या वक्तव्याची चर्चा रंगली आहे.

अखिल भारतीय मराठी नाट्य संमेलनाचं शंभरावं वर्ष असल्यामुळे कलाकारांमध्ये उत्साहाचं वातावरण आहे. अखिल भारतीय मराठी नाट्य संमेलन 6 आणि 7 जानेवारी 2024 रोजी उद्योगनगरी म्हणून ओळखल्या जाणाऱ्या पिंपरी-चिंचवड शहरामध्ये आयोजित करण्यात आलं आहे. संमेलनाचा पहिला दिवस आहे आणि संमेलनाची सुरुवात मोठ्या उत्साहात झाली आहे.