Shehnaaz Gill | शहनाज गिलला डेट करण्याच्या चर्चांवर अखेर राघव जुयालने सोडलं मौन; स्पष्टच म्हणाला..
'डान्स इंडिया डान्स' या शोमध्ये भाग घेत राघवने करिअरची सुरुवात केली. त्यानंतर त्याने बऱ्याच डान्सिंग शोजचं सूत्रसंचालन केलं. यामध्ये डान्स दिवाने 3 आणि डान्स प्लस 6 यांचा समावेश आहे.
मुंबई : अभिनेता सलमान खानच्या ‘किसी का भाई किसी की जान’ या चित्रपटात कलाकारांची मोठी फौज पहायला मिळणार आहे. पूजा हेगडे, व्यंकटेश डग्गुबती, जस्सी गिल, सिद्धार्थ निगम, भूमिका चावला, जगपती बाबू, पलक तिवारी, शहनाज दिल, अभिमन्यू सिंग या कलाकारांनी चित्रपटात महत्त्वपूर्ण भूमिका साकारल्या आहेत. डान्सर राघव जुयालसुद्धा या चित्रपटात झळकणार आहे. चित्रपट प्रदर्शित होण्यापूर्वीच डेटिंगच्या चर्चांमुळे राघव प्रकाशझोतात आला आहे. बिग बॉस फेम अभिनेत्री आणि चित्रपटातील सहकलाकार शहनाज गिलसोबत त्याचं नाव जोडलं जातंय. त्यावर आता राघवने अखेर मौन सोडलं आहे.
काय म्हणाला राघव?
‘डीएनए’ला दिलेल्या मुलाखतीत राघव म्हणाला, “इंटरनेटवरील गोष्टी माझ्यापर्यंत पोहोचत नाहीत. जोपर्यंत मी स्वत: ते पाहत नाही किंवा ऐकत नाही, तोपर्यंत ते खरं आहे की खोटं ते मला माहीत नाही. मी इथे चित्रपटासाठी आलो आहे आणि मला लोकांनी एक अभिनेता, डान्सर आणि सूत्रसंचालक म्हणून ओळखावं अशीच माझी इच्छा आहे. मी कामातून व्यक्त होतो. बाकी या सर्व गोष्टी (डेटिंगच्या चर्चा) असो किंवा नसो.. आणि हे सर्व शक्यच नाही. कारण माझ्याकडे तेवढा वेळच नाही. मी डबल शिफ्टमध्ये काम करतो. सध्या माझी परिस्थिती अशी आहे की या सर्व गोष्टींसाठी माझ्याकडे वेळच नाही.”
View this post on Instagram
गेल्या काही दिवसांपासून राघव आणि शहनाज यांच्या डेटिंगच्या जोरदार चर्चा आहेत. इतकंच नव्हे तर हे दोघं लिव्ह-इन रिलेशनशिपमध्ये राहत आहेत, असंही म्हटलं जात होतं. मात्र राघवने शहनाजला डेट करत नसल्याचं सांगत चर्चांना पूर्णविराम दिला आहे.
‘डान्स इंडिया डान्स’ या शोमध्ये भाग घेत राघवने करिअरची सुरुवात केली. त्यानंतर त्याने बऱ्याच डान्सिंग शोजचं सूत्रसंचालन केलं. यामध्ये डान्स दिवाने 3 आणि डान्स प्लस 6 यांचा समावेश आहे. याशिवाय त्याने डिस्ने प्लस हॉटस्टारवरील ‘बहुत हुआ सम्मान’मध्येही भूमिका साकारली होती. आता सलमानच्या ‘किसी का भाई किसी की जान’ या चित्रपटात तो महत्त्वपूर्ण भूमिका साकारणार आहे. हा चित्रपट येत्या 21 एप्रिल रोजी प्रदर्शित होणार आहे.
