विराट कोहलीच्या मेहुण्याचा ॲमेझॉन-नेटफ्लिक्सशी मोठा करार; तब्बल 400 कोटी रुपयांची केली डील

मुंबई | 23 जुलै 2023 : विराट कोहली हा सर्वांत लोकप्रिय क्रिकेटपटूंपैकी एक आहे. विराटची पत्नी अनुष्का शर्मा बॉलिवूड इंडस्ट्रीतील प्रसिद्ध अभिनेत्री आहे, हे तर सर्वांनाच माहीत आहे. मात्र त्याचा मेहुणासुद्धा सध्या बॉलिवूड इंडस्ट्रीत नाव कमावतोय. अनुष्काचा भाऊ आणि विराटचा मेहुणा कर्णेश शर्मा हा इंडस्ट्रीतील यशस्वी चित्रपट निर्माता आहे. कर्णेश हा अनुष्काचा मोठा भाऊ आहे. बहिणीसोबत मिळून त्याने ‘क्लिन स्लेट फिल्म्स’ या प्रॉडक्शन हाऊसची स्थापना केली. या प्रॉडक्शन हाऊसअंतर्गत गेल्या दहा वर्षांत बरेच हिट चित्रपट प्रेक्षकांच्या भेटीला आले.

2013 मध्ये प्रॉडक्शन हाऊसची स्थापना

2013 मध्ये अनुष्का शर्मा आणि कर्णेश शर्मा या दोघांनी मिळून स्वत:च्या प्रॉडक्शन हाऊसची स्थापना केली. आता दहा वर्षांनंतर ‘टॉफलर’च्या मते ‘क्लिन स्लेट फिल्म्स’ची कमाई 100 कोटी रुपयांच्या घरात आहे. कर्णेशने अनुष्का शर्माला घेऊन काही हिट चित्रपटांची निर्मिती केली. यात फिलौरी आणि NH10 या चित्रपटांचा समावेश आहे. कर्णेशच्या यशाचा हा प्रवास अनुष्काची मुख्य भूमिका असलेल्या NH10 या चित्रपटाच्या निर्मितीपासूनच झाली. 30 कोटी रुपयांच्या बजेटमध्ये बनलेल्या या चित्रपटाने बॉक्स ऑफिसवर तशी फारशी कमाई केली नाही. पण गेल्या काही वर्षांतील तो सर्वोत्कृष्ट ॲक्शन थ्रिलर चित्रपट म्हणून ओळखला जातो.

हिट चित्रपटांची निर्मिती

NH10 या चित्रपटाशिवाय त्याने फिलौरी, परी आणि बुलबुल यांसारख्या चित्रपटांचीही निर्मिती केली. काही दिवसांपूर्वी नेटफ्लिक्सवर प्रदर्शित झालेल्या ‘कला’ या चित्रपटाचंही प्रेक्षक-समीक्षकांकडून कौतुक झालं. अनुष्का शर्माच्या आगामी ‘चकदा एक्स्प्रेस’ या चित्रपटाची निर्मितीही कर्णेश करत आहे. भारतीय क्रिकेटपटू झुलन गोस्वामीच्या जीवनावर आधारित हा चित्रपट आहे.

हे सुद्धा वाचा

Himesh Reshammiya | सख्ख्या भावाचं निधन अन् वडिलांची एक अपुरी इच्छा; अशा प्रकारे हिमेश रेशमियाँ बनला स्टार

Palak Tiwari | सैफच्या मुलासोबत पलक तिवारीची ‘मूव्ही डेट’; लपून-छपून भेटले पण झाली ‘ही’ एक चूक

Alia Bhatt | आलिया भट्टची मुलगी फिल्म इंडस्ट्रीत पाऊल ठेवणार नाही? राहा कपूरच्या करिअर प्लॅनचा खुलासा

या हँडसम हंकला आल्या होत्या लग्नाच्या तब्बल 30 हजार मागण्या; आता 12 वर्षांनी लहान अभिनेत्रीला करतोय डेट

नेटफ्लिक्स – ॲमेझॉनशी मोठा करार

नुकताच कर्णेश शर्मा आणि अनुष्का शर्मा यांच्या ‘क्लिन स्लेट फिल्म्स’ने नेटफ्लिक्स आणि ॲमेझॉन प्राइम या दोन मोठ्या ओटीटी प्लॅटफॉर्म्ससोबत मोठा करार केला आहे. हा करार 400 कोटी रुपयांपेक्षा जास्त आहे आणि त्याअंतर्गत कर्णेश ओटीटी प्लॅटफॉर्मवर आठ चित्रपट प्रदर्शित करणार आहे. या डीलमधील पहिला चित्रपट ‘कला’ होता. हा चित्रपट तर हिट ठरलाच पण त्यातील गाण्यांनाही खूप पसंती मिळाली. यापुढे कोणते चित्रपट प्रदर्शित होणार, याची माहिती येत्या काळात प्रेक्षकांना मिळेल.