मतदानाच्या धामधुमीत बीडमध्ये मन हेलावणारी घटना, अपक्ष उमेदवाराला मतदान केंद्रावर हृदयविकाराचा झटका, लोक सुन्न!
महाराष्ट्र विधानसभा निवडणुकीच्या दिवशी बीडमधील अपक्ष उमेदवार बाळासाहेब शिंदे यांचा हृदयविकाराच्या झटक्याने मृत्यू झाला आहे. मतदान केंद्रावरच त्यांना हृदयविकाराचा झटका आला. त्यांच्या अचानक निधनाने बीडमध्ये शोककळा पसरली आहे.
महाराष्ट्रासाठी आज मोठा दिवस होता. कारण महाराष्ट्र विधानसभेच्या 2024 च्या निवडणुकीसाठी आज दिवसभर मतदान पार पडलं आहे. या मतदानाच्या दिवशी अनेक ठिकाणी मोठमोठे राडे झालेले बघायला मिळाले. काही ठिकाणी बुथवर राडा झालेला बघायला मिळाला. पण तरीही लोकांनी मतदानाला उत्सफुर्त प्रतिसाद दिला. असं असताना बीड शहरात एक दुर्दैवी घटना आज घडली आहे. या घटनेमुळे संबंधित परिसरात प्रचंड हळहळ व्यक्त केली जात आहे. राज्यभरात विधानसभा निवडणुकीसाठी मतदान पार पडत असताना बीड विधानसभा मतदासंघात दुर्दैवी घटना घडली. बीड विधानसभा मतदारसंघाचे अपक्ष उमेदवार बाळासाहेब शिंदे यांना हृदयविकाराचा तीव्र झटका आला. या तीव्र झटक्याने त्यांचा दुर्दैवी मृत्यू झाला आहे. विशेष म्हणजे मतदान केंद्रावरच बाळासाहेब शिंदे यांना हृदयविकाराचा धक्का आला आणि जागेवरच त्यांचा मृत्यू झाल्याची माहिती आहे. या घटनेमुळे संबंधित परिसरात प्रचंड हळहळ व्यक्त केली जात आहे.
नेमकं काय घडलं?
मिळालेल्या माहितीनुसार, विधानसभा निवडणुकीसाठी प्रत्येत उमेदवार आणि नेतेमंडळी वेगवेगळ्या बुथवर जावून मतदान योग्य होत आहे ना, कुठे गैरप्रकार होत नाही ना? याची शाहनिशा करण्यासाठी विविध पोलिंग बुथला भेट देतात. अर्थात तो त्यांचा अधिकार आहे. बाळासाहेब शिंदे हे देखील बीड शहरातील छत्रपती शाहू विद्यालयात पोलिंग बुथवर पाहणी करण्यासाठी आले होते. सर्व काही सुरळीत होत आहे ना? याकडे ते लक्ष देत होते. यावेळी त्यांचे कार्यकर्तेदेखील त्यांच्यासोबत होते.
या दरम्यान, अचानक बाळासाहेब शिंदे यांना हृदयविकाराचा तीव्र झटका आला. हा झटका आल्यानंतर ते जमिनीवर कोसळले. त्यामुळे पोलिंग बुथवर एकच खळबळ उडाली. त्यांच्या कार्यकर्त्यांना देखील आश्चर्याचा मोठा धक्का बसला. तसेच मतदारही नेमकं काय घडलं? हे पाहण्यासाठी त्यांच्याकडे धावत आले.
बाळासाहेब शिंदे यांची प्रकृती जास्त गंभीर असल्याने त्यांना तातडीने जवळील रुग्णालयात नेण्यात आलं. त्यांना बीड शहारातील एका खासगी रुग्णालयात दाखल करण्यात आलं. पण तिथून त्यांना लगेच छत्रपती संभाजीनगर येथील रुग्णालयात हलवण्यात आलं. तिथे गेल्यावर डॉक्टरांनी त्यांना मृत घोषित केलं. या घटनेमुळे बीड शहरात प्रचंड हळहळ व्यक्त केली जात आहे. या घटनेमुळे बाळासाहेब शिंदे यांच्या कुटुंबावर मोठं संकट कोसळलं आहे. तसेच त्यांच्या कार्यकर्त्यांनादेखील मोठा धक्का बसला आहे.
