ठाकरे शिवसेना भवन सांभाळतील, पण त्या आधी या गोष्टी जाण्याची शक्यता
शिवसेना पक्ष चिन्ह आम्हाला मिळाले आहे, त्यामुळे शिवसेना शाखा आमचीच आहे, असे म्हणत शेकडो कार्यकर्ते जोरदार घोषणाबाजी करत होते. यावेळी पोलिसांनी बळाचा वापर केल्यामुळे अनुचित प्रकार घडला नाही.
मुंबई : माजी मुख्यमंत्री उद्धव ठाकरे यांच्यांकडून शिवसेनेचं नाव आणि धनुष्यबाण चिन्ह (Shiv Sena Symbol) गेले आहे. केंद्रीय निवडणूक आयोगाने याबाबतचा आदेश शुक्रवारी दिला. निवडणूक आयोगाच्या निकालात शिवसेनेचं नाव आणि धनुष्यबाण चिन्ह हे एकनाथ शिंदे यांच्या गटाला दिले आहे. आता एकनाथ शिंदे यांचा पुढील डाव काय आहे? दादरचे शिवसेना भवन त्यांना मिळणार नाही. यामुळे त्याठिकाणी एकनाथ शिंदे यांचे लक्ष नाही. परंतु शिवसेनेचा पाया समजल्या जाणाऱ्या राज्यातील असंख्य शाखांवर त्याचे लक्ष असणार आहे. रत्नागिरीच्या दापोलीमध्ये शुक्रवारी स्थानिक शाखेच्या नियंत्रणावरून दोन्ही गटातील कार्यकर्त्यांमध्ये हाणामारी झाली होती. शाखांचे नेटवर्क अजूनही आपल्यासोबत आहे, असे उद्धव ठाकरे गटाच्या पदाधिकाऱ्यांनी सांगितले.
शिवसेना भवन कोणाचे?
शिवसेनेचे दादरमधील सेना भवन यावर पक्षाची मालकी नाही. हे भवन शिवाई ट्रस्टच्या मालकीचे आहे. शिवाई ट्रस्टचे अध्यक्ष लीलाधर डाके आहेत. ते उद्धव ठाकरे यांचे विश्वासू आहेत. तसेच इतर ट्रस्टीही उद्धव ठाकरे यांच्या विश्वासातील आहे. यामुळे पक्ष आणि चिन्ह गेले तरी शिवाई ट्रस्ट म्हणजेच शिवसेना भवन उद्धव ठाकरे यांचे राहणार आहे.
दापोलीत नेमके काय झाले
शिंदे गटातील आमदार योगेश कदम समर्थकांनी उद्धव ठाकरे गटाच्या शाखेत घुसून जोरदार घोषणाबाजी केली होती. शुक्रवारी झालेल्या या प्रकारामुळे दापोलीत तणावाचे वातावरण होते. या ठिकाणी उद्धव ठाकरे गटाची शाखा शिंदे गट समर्थकांनी ताब्यात घेतली होती. शिवसेना पक्ष चिन्ह आम्हाला मिळाले आहे, त्यामुळे शिवसेना शाखा आमचीच आहे, असे म्हणत शेकडो कार्यकर्ते जोरदार घोषणाबाजी करत होते. यावेळी पोलिसांनी बळाचा वापर केल्यामुळे अनुचित प्रकार घडला नाही. या प्रकरणी दोन्ही गटांवर गुन्हे दाखल केले आहे.
आता शिंदे यांची काय असणार खेळी
काही राजकीय निरीक्षकांच्या मते, आता शिंदे सेना टप्प्याटप्प्याने शिवसेनेच्या शाखा ताब्यात घेऊ शकते. शिंदे यांच्या गटाला निवडणूक आयोगाने खरी शिवसेना म्हणून मान्यता दिली. यामुळे शिवसेनेच्या विविध शाखा आणि आघाड्या हा एक वादाचा विषय ठरणार आहे. पक्षाचे नाव आणि निवडणूक चिन्ह गेल्यानंतरही उद्धव गट शाखा आणि पदाधिकारी कसे टिकवणार हा वेगळा प्रश्न आहे. शिवसेनेच्या राज्यभरात अनेक शाखा आहेत. त्यांची कार्यालये आहे. परंतु त्यातील किती कार्यालये अधिकृत आहेत, ती कोणाच्या नावावर आहे, याची माहिती उपलब्ध नाही.
काय म्हणतात संजय राऊत
दुसरीकडे उद्धव गटाचे नेते संजय राऊत म्हणाले की, शिवसेना भवन आणि शिवसेनेच्या शाखा शिंदे गटास घेता येणार नाही. आमचे शिवसैनिक तिथे बसून राहतील. शिवसेनेच्या शाखा नेहमीप्रमाणे चालवतील.
