आईला मामाकडे पाठवलं, मग मुलीचा गळा घोटला, शॉक लागल्याचा केला बनाव
मुलीने ही सोयरीकी आठ दिवसांत मोडली. त्यामुळे बदनामी गेल्याच्या रागातून शुभांगीच्या वडील व भावांनी तिची हत्या केली.
नांदेड : नांदेड जिल्ह्यामध्ये (Nanded News) ऑनर किलिंगचा (owner killing) धक्कादायक प्रकार समोर आलाय. जन्मदात्या बापाने २३ वर्षीय मुलीची हत्या केली. हत्या करुन मुलीचा मृतदेह जाळून टाकला. मृतदेहाची राख ओढ्यात फेकून दिली. या प्रकरणी मुलीच्या बाप व भावासह पाच जणांना अटक करण्यात आली आहे. त्यांच्या चौकशीतून धक्कादायक खुलासे होत आहे. नांदेड जिल्ह्यातील पिंपरी महीपाल गाव लिंबगाव पोलिस ठाण्यापासून ८ किलोमीटर अंतरावर आहे.
गावातील जनार्दन लिंबाजी जोगदंड हे मध्यमवर्गीय शेतकरी. त्यांची २३ वर्षीय शुभांगी जोगदंड ही नांदेडच्या आयुर्वेदीक महाविद्यालयात BHMS च्या तिसऱ्या वर्षात शिकत होती. तिचे गावातील एका तरुणासोबत प्रेम होते. परंतु हे प्रेम कुटुंबीयांनी मान्य नव्हते. त्यामुळे तीन महिन्यांपूर्वी तिची सोयरीक दुसरीकडे करुन दिली होती.
मुलीने ही सोयरीकी आठ दिवसांत मोडली. त्यामुळे बदनामी गेल्याच्या रागातून शुभांगीचे वडील जनार्दन लिंबाजी जोगदंड, भाऊ कृष्णा जोगदंड, चुलत भाऊ गिरीधारी जोगदंड, शेषराव जोगदंड, गोविंद जोगदंड व मामा केशव शिवाजी कदम यांनी २२ जानेवारी रोजी तिची हत्या केली. हत्येनंतर तिचा मृतदेह खताच्या गोण्यात टाकून शेतात नेला. शेतात ज्वारीच्या पिकांत सरण रचून शुभांगीचा मृतदेह जाळून टाकला.
आईला पाठवले मामांकडे
शुभागांची हत्या करण्यापुर्वी तिच्या आईला मामांकडे पाठवण्यात आले. त्यानंतर इलेक्ट्रीक शेगडी पेटवत असताना शुभांगीला शॉक लागल्याचे तिच्या आईला सांगितले. सरणाला अग्नी देण्यापुर्वी शुभांगीच्या आईला शेतात आणण्यात आले. तिला फक्त शुभांगीचा चेहरा दाखवला. त्यानंतर सरण पेटवण्यात आले. या प्रकरणाचे बिंग फुटल्यानंतर शुभांगीच्या आईला धक्काच बसला. आई मामाकडे असल्याने तिला या घटनेची कुणकुण सुद्धा लागली नाही.
मोठ्या मुलीला नव्हती कल्पना
पिंपरी महीपाल गावातील लोकांचा शेती हेच उपजीविकेचे साधन. जनार्दन लिंबाजी जोगदंड हे मध्यमवर्गीय शेतकरी. त्यांना एक मुलगा व दोन मुली आहेत. मोठ्या मुलीचे लग्न गावातच झाले होते. परंतु बहिणीच्या हत्येची कल्पना तिला आली नाही.
आरोपींना ३ फेब्रवारीपर्यंत कोठडी
२६ जानेवारी रोजी एका निनावी फोनमुळे शुभांगीच्या हत्येचा प्रकार उघड झाला. त्यानंतर शुभांगीचे वडील जनार्दन लिंबाजी जोगदंड, भाऊ कृष्णा जोगदंड, चुलत भाऊ गिरीधारी जोगदंड, शेषराव जोगदंड, गोविंद जोगदंड व मामा केशव शिवाजी कदम यांना पोलिसांनी अटक केली. ३ फेब्रवारीपर्यंत त्यांना पोलीस कोठडी दिली आहे.
