पुणे शहरात हॉकीचा वाद पेटला, अल्पवयीन मुलींसह चौघांना जबर मारहाण
पुणे शहरात हॉकी खेळावरून काही वाद झाले होते. या गोष्टीचा राग मनात ठेवून आरोपींनी मित्राच्या तीन बहिणींना आणि आईला मारहाण केली. या घटनेत चौघे जण जखमी झाले आहेत. त्यातील दोघांची प्रकृती गंभीर आहे. त्यांना रुग्णालयात दाखल करण्यात आलेय.
अभिजित पोटे, पुणे : पुण्यात हॉकी खेळण्याचा वादातून चार जणांनी मित्राच्या तीन अल्पवयीन बहिणींवर व आईवर प्राणघातक हल्ला केला. ११, १५ आणि १६ वर्षीय मुलींवर हल्ला करण्यात आला. चार जणांनी या तीन मुलींना व तिच्या आईला लोखंडी रॉड, पाईपने मारहाण केली. चौघांच्या टोळक्याने केलेल्या हल्ल्यात तीन अल्पवयीन मुली गंभीर जखमी झाल्या आहेत. त्यांना रुग्णालयात दाखल करण्यात आले आहे. पुणे शहरातील वारजे भागातून ही धक्कादायक घटना समोर आली आहे. या प्रकरणी पोलिसात गुन्हा दाखल झाला आहे.
काय आहे प्रकार
मिळालेल्या माहितीनुसार, कृष्णा सहानी यांनी या संदर्भात पोलिसांत तक्रार दिली आहे. त्यानंतर या प्रकरणी रामनाथ सहानी,राम सहानी आणि दोन जणांना पोलिसांनी अटक केली आहे. ही संपूर्ण घटना रविवारी रात्री ८.३० वाजण्याच्या सुमाराची आहे. वारजेतील दांगट वस्ती जवळ हा प्रकार घडला होता. कृष्णा सहानी आणि आरोपी हे दोघेही एकमेकांना ओळखतात.
दोघांमध्ये झाला होता वाद
कृष्णा आणि आरोपींमध्ये हॉकी खेळावरून काही वाद झाला होता. या गोष्टीचा राग मनात ठेवून आरोपींनी फिर्यादी कृष्णा याला मारण्यासाठी थेट घरात प्रवेश केला. यावेळी आरोपींना कृष्णा घरात मिळाला नाही. त्यामुळे त्यांनी घरातील उपस्थित असलेल्या महिलांना लोखंडी रॉडने मारहाण केली.
त्यात कृष्णा याच्या तीन बहिणी आणि आई होत्या. या हल्ल्यात कृष्णा यांची आई तसेच तीन लहान बहिणी यांच्यावर रामनाथ सहानी, राम सहानी आणि इतर दोन साथीदारांनी हल्ला केला. रक्ताच्या थारोळ्यात पडलेल्या या लहान मुलींना नागरिकांनी तात्काळ रुग्णालयात दाखल केले असून यातील दोन जणींची प्रकृती गंभीर आहे. या घटनेनंतर वारजे पोलिस ठाण्यात आरोपींच्या विरोधात हत्येचा प्रयत्न केल्याप्रकरणी गुन्हा दाखल करण्यात आला आहे.
