‘तुम्ही मला शिकवू नका’, संतापलेल्या आमदाराने अधिकाऱ्याला दिले कायद्याचे धडे
भाजप आमदार गणपत गायकवाड (BJP MLA Ganpat Gaikwad) यांचा अधिकाऱ्यासोबत शाब्दिक चकमक झाल्याचा एक व्हिडीओ सोशल मीडियावर व्हायरल होतोय. या व्हिडीओत ते चांगलेच संतापलेले दिसले.
सुनील जाधव, Tv9 मराठी, कल्याण (ठाणे) : जागेचा वाद न्यायप्रविष्ट असताना सर्व्हेअरने सर्व्हे सुरु केला. भाजप आमदाराने फोनवर जाब विचारला तेव्हा आमदारांनाही उलटसूलट उत्तरे दिली. अखेर संतापलेल्या भाजप आमदार गणपत गायकवाड (BJP MLA Ganpat Gaikwad) यांनी घटनास्थळी धाव घेत संबंधित अधिकाऱ्यांना कायद्याचे धडे दिले. संतप्त भाजप आमदारांचा व्हिडीओ सोशल मीडियावर व्हायरल (Video Viral) होतोय. कल्याण ग्रामीणमधील वसार गावात एका शेतकऱ्याची जागा आहे. या जागेच्या मालकी हक्कावरुन न्यायालयात खटला न्यायप्रविष्ट आहे. जागेच्या सर्व्हेसाठी सर्व्हेअरकडून सर्व्हे करण्याचा निर्णय घेतला गेला. मात्र या सर्व्हेला शेतकऱ्यांनी विरोध करत संबंधित विभागाला कायदेशीर नोटीस बजावली.
एवढं सर्व घडलेलं असताना शनिवारी सर्व्हेअर जागेच्या मोजणीसाठी आले. ही माहिती मिळताच भाजप आमदार गणपत गायकवाड यांनी संबंधित अधिकाऱ्याला फोन करुन जाब विचारला.
मात्र फोनवर अधिकाऱ्यांनी आमदारांना उलटसूलट उत्तर दिले. त्यानंतर संतापलेल्या भाजप आमदार गणपत गायकवाड हे थेट घटनास्थळी पोहचत त्या अधिकाऱ्याला धारेवर धरले. त्यावेळी भाजप आमदारांनी संबंधित अधिकाऱ्यांना तू आम्हाला कायदा शिवणार का? काय कायदा आहे? किती पैसे घेतले? असे प्रश्न गणपत गायकवाड यांनी उपस्थित केले.
आम्ही जिथे बसलो तिथे कायदेच बनवतो. पण तुम्हाला कायद्याने काम करायचं नाही असे सांगत आमदारांनी अधिकाऱ्याला झापले.
काँग्रेस नेते अशोक चव्हाण हे मुख्यमंत्री असताना मी त्यांचा कोनगावमध्ये सर्व्हे थांबवला होता. आता तू मला कायदा शिकवायला चल असे बोलत संबंधित नेत्यांकडे चौकशी लावणार असल्याचा इशारा गणपत गायकवाड यांनी दिला.
आम्ही आमदार गणपत गायकवाड यांना विचारणा केली असता त्यांनी हे प्रकरण न्यायप्रविष्ट असताना सर्व्हेअरने प्रत्यक्ष जागी पंचनामा केला पाहिजे. त्याचा रिपोर्ट दिला पाहिजे. परंतू अधिकाऱ्याने असे न करता थेट सर्व्हे सुरु केला. नियमबाह्य काम करने चुकीचे आहे. यासाठी मी त्याठिकाणी गेलो, असे आमदारांनी सांगितले.
