रिक्षातून जात होते केजरीवाल; गुजरात पोलिसांनी भर रस्त्यात रोखले आणि मग…

अहमदाबाद : दिल्ली, पंजाबपाठोपाठ आता गुजरात काबीज करण्याचा निर्धार आम आदमी पार्टी (Aam Adami Party)ने केला आहे. त्या अनुषंगाने पक्षाचे सर्वेसर्वा अरविंद केजरीवाल (Arvind Kejariwal) हे गुजरातमध्ये आपला जनसंपर्क आणखी भक्कम करीत आहेत. याचदरम्यान त्यांना गुजरातमधील सत्ताधारी भाजपकडून शह देण्याचाही प्रयत्न सुरु आहेत. दोन पक्षांमधील शीतयुद्व गेल्या काही दिवसांत चव्हाट्यावर येऊ लागले आहे. अशातच सोमवारी केजरीवाल यांची अहमदाबाद पोलिसांशी बाचाबाची झाली. याला निमित्त होते, ते पोलिसांनी रोखलेल्या रिक्षा (Rikshaw) प्रवासाचे.

केजरीवाल एका रिक्षात बसले, तेव्हा पोलीस लगेच तिथे आले आणि त्यांनी केजरीवाल यांना रिक्षात बसण्यापासून रोखले. त्यावरून केजरीवाल आणि पोलिसांमध्ये बाचाबाची झाली. हा प्रकार गुजरातसह सर्वत्र चर्चेचा विषय बनला आहे.

पोलीस जबरदस्ती करताहेत – केजरीवाल

केजरीवाल यांना सोमवारी अहमदाबादमध्ये पोलिसांनी ऑटोमध्ये बसण्यापासून रोखले. यावेळी पोलिसांनी सुरक्षेचा हवाला दिला. मात्र त्यावरून वातावरण शांत झाले नाही, उलट काही काळ जोरदार वादावादी झाली.

हे सुद्धा वाचा

कारला धक्का लागल्याचा राग, संतापलेल्या कार चालकाने काका-पुतण्यासोबत केले ‘हे’ कृत्य

भ्रष्टाचार प्रकरणात भाजपचा ‘हा’ बडा नेता ईडीच्या तावडीत सापडणार ?; आरटीआय कार्यकर्त्याने केली चौकशीची मागणी

मध्यरात्री तलवारी आणि दांडके घेऊन येतात…घरावर दगड फेक करत हैदोस घालणाऱ्या टोळीचा बंदोबस्त कधी होणार?

संतप्त झालेल्या केजरीवालांनी पोलिसांच्या भूमिकेवर आक्षेप घेतला. तुम्ही मला जबरदस्तीने सुरक्षा देत आहात. मला हे संरक्षण नको आहे, असे म्हणणे केजरीवाल यांनी मांडले.

ऑटो चालकाच्या घरी जेवायला चालले होते केजरीवाल

वास्तविक, केजरीवाल हे त्यांच्या हॉटेलमधून एका ऑटोचालकाच्या रिक्षातून त्याच्या घरी जेवणासाठी जात होते. याचदरम्यान पोलिसांनी त्यांना रोखले आणि वादावादीला निमंत्रण मिळाले.

केजरीवाल आणि गुजरात पोलिसांमधील बाचाबाचीचा व्हिडिओ व्हायरल झाला आहे. त्यात केजरीवाल स्पष्ट बोलत आहेत की, म्हणूनच गुजरातमधील जनता नाराज आहे. कारण नेते जनतेत जात नाहीत.

आम्ही लोकांमध्ये जातोय, म्हणून आम्हाला थांबवले जात आहे. तुमच्या प्रोटोकॉलने जनतेला नाखूष ठेवले आहे, असा आरोप केजरीवाल यांनी केला. आपल्याला पोलीस संरक्षणाची गरज नसल्याचे ते वारंवार सांगत असल्याचे व्हिडिओमध्ये दिसत आहे.

काय प्रकरण आहे?

केजरीवाल यांनी सोमवारी अहमदाबादमध्ये रिक्षाचालकांच्या मेळाव्याला संबोधित केले. यादरम्यान एका ड्रायव्हरने केजरीवाल यांना आपल्या घरी जेवण्यासाठी बोलावले. केजरीवाल यांनी त्याची विनंती लगेच स्वीकारली.

त्यांच्या संभाषणाचा व्हिडिओही आम आदमी पक्षाच्या अधिकृत ट्विटर हँडलवर शेअर करण्यात आला आहे. व्हिडिओमध्ये ऑटोचालक केजरीवाल यांना जेवणासाठी आमंत्रित करताना दिसत आहे. विक्रम दत्तानी असे त्या ऑटोचालकाचे नाव आहे.