शिरसाट यांच्या नशिबी पुन्हा आले वेटींग, यावेळीही भुमरे यांनीच मारली बाजी

औरंगाबाद : गेल्या सहा-सात महिन्यांपुर्वी राज्यात सत्तांतर झाले. या सत्तांतर नाट्यात शिंदे गट आणि फडणवीस (Eknath Shinde and Devendra Fadnavis) यांचं सरकार सत्तेवर आलं. काही महिने दोन जणांचे मंत्रिमंडळ होते. त्यानंतर मंत्रिमंडळ विस्ताराची वाट पाहणाऱ्या अनेक आमदारांपैकी काहींना पहिल्या विस्तारात संधी मिळाली. औरंगाबाद जिल्ह्यातून संजय शिरसाट ऐवजी संदीपान भुमरे यांना संधी मिळाली. अन् संजय शिरसाट दुसऱ्या मंत्रिमंडळ विस्तारापर्यंत वेटींगवर गेले. शिरसाट यांनी आपली व्यथ्या अनेक वेळा माध्यमांसमोर मांडली.

पुन्हा वेटींगचा अनुभव

अर्थात पक्षश्रेष्ठींसमोरही मांडलीच असणार. परंतु विस्तार होत नसल्याने मंत्रिमंडळात ते वेटींगवरच आहे. वेटींगचा पुन्हा एक अनुभव संजय शिरसाट यांना आला. मुख्यमंत्री एकनाथ शिंदे रविवारी औरंगाबाद दौऱ्यावर होते. बिडकीन येथे आयोजित निरंकारी संत समागम सोहळ्याला जाण्यासाठी ते आले होते. मुख्यमंत्री येणार म्हणून औरंगाबाद विमानतळावर मंत्री संदीपान भुमरे आणि आमदार संजय शिरसाट यांनी आपल्या आलिशान गाड्या आणल्या होत्या. दोन्ही नेत्यांच्या गाड्या या लँड रोव्हर डिफेन्डर आहेत. फक्त रंग आणि दोन्ही गाड्यांचे क्रमांक वेगळे होते.

विमानतळावर दोन्ही गाड्या शेजारीच उभ्या होत्या. मुख्यमंत्री शिंदे यांनी आपल्या गाडीत बसावे अशी शिरसाट व भुमरे यांची इच्छा होती. मुख्यमंत्री विमानतळाबाहेर येत असताना शिरसाट आपली गाडी घेऊन उभे होते. पण मुख्यमंत्री भुमरे यांच्या गाडीत बसले आणि बिडकीनकडे रवाना झाले.

नाराजी लपवली

एकनाथ शिंदे भुमरे यांच्या गाडीत बसल्यामुळे शिरसाट थोडे नाराज झाल्याचे दिसले. पण ही नाराजी त्यांनी लागलीच लपवली. ते लगेच आपल्या गाडीत बसले अन् मुख्यमंत्र्यांच्या गाडीमागून बिडकीनकडे रवाना झाले.या प्रकारामुळे मुख्यमंत्र्यांनी मंत्रिमंडळाप्रमाणेच इथेही शिरसाट वेटींगवर ठेवल्याची चर्चा सुरु झाली.