आदित्य ठाकरे खरंच बाळासाहेबांचे नातू? नितेश राणे यांनी का उपस्थित केला सवाल?

मुंबई, ३० सप्टेंबर २०२३ | छत्रपती शिवाजी महाराज यांनी वापरलेली वाघनखं लवकरच भारतात परत आणण्यात येणार आहे. येत्या १६ नोव्हेंबरला शिवरायांची वाघनखं मुंबईत आणण्यात येणार असून ती तीन वर्षांसाठी भारतात असणार आहे. दरम्यान, यावरून आदित्य ठाकरे यांनी राज्य सरकारला थेट सवाल करत स्पष्टीकरण मागितले आहे. ते म्हणाले, राज्यात आणण्यात येणाऱ्या छत्रपती शिवाजी महाराज यांच्या वाघनखांबाबत राज्य सरकारने स्पष्टता करावी, अशी मागणी केली. यावरूनच नितेश राणे हे आदित्य ठाकरे यांच्या विरोधात आक्रमक होत त्यांनी आदित्य ठाकरे यांच्यावर जहाल टीका केली. अफझलखानाचे वंशजच शिवरायांच्या इतिहासावर प्रश्न चिन्ह उपस्थित करू शकतात. असे म्हणत आदित्य ठाकरे खरंच बाळासाहेबांचे नातू आहे का? पुरावे मागितले तर चालतील का? असा सवाल केला आहे. आमच्यासारख्या मावळ्यांना ही वाघनखं चांगल्या प्रकारे वापरता येतात, हे त्यांनी लक्षात ठेवावं, असे म्हणत नितेश राणेंनी आदित्य ठाकरेंना इशारा दिला आहे.