Ankita Lokhande: अंकिता लोखंडे-विकी जैनने पटकावला ‘स्मार्ट जोडी’चा किताब; जाणून घ्या बक्षिसाची रक्कम
विजेतेपद पटकावल्यानंतर त्यांना 25 लाख रोख बक्षीस आणि गोल्डन गठबंधन ट्रॉफी मिळाली आहे. या यशानंतर अंकिता लोखंडेने सोशल मीडियावर एक व्हिडिओ शेअर केला आहे, ज्यामध्ये तिने या सुंदर क्षणाबद्दल आपल्या भावना व्यक्त केल्या आहेत.
अभिनेत्री अंकिता लोखंडे (Ankita Lokhande) आणि तिचा विकी जैन (Vicky Jain) यांनी ‘स्मार्ट जोडी’चा (Smart Jodi) किताब पटकावला आहे. लग्नानंतर काही दिवसांनीच या दोघांनी रिॲलिटी शोमध्ये भाग घेतला. विजेतेपद पटकावल्यानंतर त्यांना 25 लाख रोख बक्षीस आणि गोल्डन गठबंधन ट्रॉफी मिळाली आहे. या यशानंतर अंकिता लोखंडेने सोशल मीडियावर एक व्हिडिओ शेअर केला आहे, ज्यामध्ये तिने या सुंदर क्षणाबद्दल आपल्या भावना व्यक्त केल्या आहेत. अंकिता आणि विकी यांनी बलराज-दिप्ती तुली यांना टक्कर देत ट्रॉफी जिंकली. बलराज आणि दिप्ती उपविजेते ठरले, तर अंकिता आणि विकी यांनी विजेतेपद पटकावलं. अंकिताने शेअर केलेल्या या व्हिडिओमध्ये बॉलिवूडमधील लोकप्रिय जोडी रितेश देशमुख आणि जेनेलिया डिसूझा मिळून अंकिता-विकीला बक्षीस देताना दिसत आहेत.
विकी हा व्यावसायिक असून त्याचा अभिनयक्षेत्राशी फारसा संबंध नाही. असं असलं तरी त्याने या शोमध्ये आपली खूप चांगली साथ दिल्याचं अंकिताने म्हटलं. “विकीने शोमध्ये खूप चांगली साथ दिली. त्याने माझ्यासारखीच स्पर्धात्मक भावना या शोमध्ये दाखवली आणि माझ्यापेक्षाही चांगलं परफॉर्म केलं. तो कॅमेरासमोर कम्फर्टेबल नाही असं मला वाटायचं. आम्ही एकमेकांना खूप चांगल्याप्रकारे समजून घेऊ शकतो, हे यातून सिद्ध झालं आहे”, अशी प्रतिक्रिया अंकिताने जिंकल्यानंतर ‘ई टाइम्स’शी बोलताना दिली. त्याचप्रमाणे या शोमध्ये आम्हाला दोघांना खूप वेळ एकत्र घालवायला मिळाला, असंही तिने सांगितलं.
पहा व्हिडीओ-
View this post on Instagram
विकी आणि अंकिता हे लग्नानंतर वेगळे राहत आहेत. कारण विकीचा व्यवसाय बिलासपूरमध्ये आहे. अंकिता इथे मुंबईत राहते आणि तो कामानिमित्त बिलासपूरला राहतो. मुंबईत या दोघांनी घर विकत घेतलं असून त्याच्या इंटेरिअरचं काम अजूनही सुरू आहे. त्यामुळे विकी जेव्हा कधी मुंबईला अंकिताला भेटायला येतो, तेव्हा तो तिच्याच घरी राहतो. “विकीमुळे माझ्या आयुष्यात समतोल निर्माण झालाय. त्याने माझ्यासाठी खूप काही केलं असून मला त्याचे आभार मानायचे आहेत”, असं अंकिता म्हणाली. अंकिता आणि विकीने डिसेंबर 2021 मध्ये लग्न केलं. मुंबईतील पंचतारांकित हॉटेलमध्ये या दोघांचा विवाहसोहळा पार पडला.
