धारावीत सिलिंडरचा स्फोट, 14 जण होरपळले; दोघांची प्रकृती चिंताजनक

धारावीतील शाहू नगरात एका घरात गॅस सिलिंडर स्फोट होऊन झालेल्या स्फोटात 14 जण होरपळले आहेत. (14 injured in cylinder blast in Dharavi in Mumbai)

cylinder blast in Dharavi

टीव्ही 9 मराठी डिजीटल टीम | Updated on: Aug 29, 2021 | 2:53 PM

अक्षय मंकनी, मुंबई: धारावीतील शाहू नगरात एका घरात गॅस सिलिंडर स्फोट होऊन झालेल्या स्फोटात 14 जण होरपळले आहेत. त्यातील 12 जण किरकोळ भाजले असून 2 जणांची प्रकृती चिंताजनक असल्याचं वैद्यकीय सूत्रांनी सांगितलं. (14 injured in cylinder blast in Dharavi in Mumbai)

धारावीच्या शाहू नगरातील कमला नगरमध्ये ही घटना घडली. धारावीच्या मुबारक हॉटेलच्या बाजूलाच कमला नगर आहे. दुपारी 12.28च्या सुमारास एका घरात गॅस सिलिंडरचा स्फोट झाला. या घटनेची माहिती मिळताच अग्निशमन दलाच्या जवानांनी घटनास्थळी धाव घेतली. यावेळी अग्निशमन दलाच्या जवानांनी दोन फायर इंजिन आइणइ एका जेटीच्या सहाय्याने आग विझवली. त्यानंतर आगीत होरपळलेल्यांना तात्काळ बाहेर काढून त्यांना सायन रुग्णालयात दाखल करण्यात आलं.

दोघे 70 टक्के भाजले

एकूण 14 जणांना सायन रुग्णालयात दाखल करण्यात आलं आहे. त्यापैकी 12 जण किरकोळ भाजले आहेत. तर 2 जणांची प्रकृती चिंताजनक आहे. हे दोघे 70 टक्के भाजल्याचं त्यांच्यावर उपचार करणाऱ्या डॉक्टर डॉ. सायली यांनी सांगितलं.

धावपळ आणि आक्रोश

गॅस सिलिंडरचा स्फोट होताच आजूबाजूच्या नागरिकांमध्ये एकच धावपळ उडाली. क्षणात आगीने पेट घेतला. त्यामुळे या घरातील आणि आजूबाजूच्या घरातील 14 जण या आगीत होरपळले गेले. त्यामुळे स्थानिकांचा एकच आक्रोश सुरू झाला. तसेच आग विझवण्यासाठी आणि जीव वाचवण्यासाठी एकच धावपळ सुरू झाली. यावेळी काही लोकांनी आगीवर पाणी टाकून आग विझवण्याचा प्रयत्न केला. हा प्रयत्न सुरू असतानाच अग्निशमन दलाच्या जवानांनी घटनास्थळी धाव घेऊन तात्काळ आग नियंत्रणात आणली. त्यानंतर स्थानिकांच्या मदतीने जखमींना रुग्णालयात नेण्यता आले.

महापौर किशोरी पेडणेकर घटनास्थळी

दरम्यान, या दुर्घटनेची माहिती मिळताच महापौर किशोरी पेडणेकर यांनी संबंधित अधिकाऱ्यांकडून माहिती घेतली. महापौर पेडणेकर घटनेची माहिती घेण्यासाठी घटनास्थळाकडे रवाना झाल्याचं सूत्रांनी सांगितलं. धारावीमध्ये खूप दाटीवाटीचा परिसर आणि निमुळत्या गल्ल्याचां परिसर असल्यामुळे हा सिलेंडरचा स्फोट आजूबाजूच्या दोन ते तीन घरांपर्यंत पसरलेला आहे. घटनास्थळी अग्निशामक दलाचे जवान आणि आणि स्थानिक पोलिस दाखल झालेले आहेत. संपूर्ण परिस्थितीवर नियंत्रण मिळवण्यात आलं आहे. नुकसान झालेल्या घरांची माहिती घेतली जात असून सध्या पंचनामा करण्याचे काम सुरू आहे. (14 injured in cylinder blast in Dharavi in Mumbai)