सोलापूर लोकसभा निवडणूक निकाल 2024

सोलापूर लोकसभेचा इतिहास

महाराष्ट्रातील सोलापूर लोकसभा मतदारसंघ हा अत्यंत महत्त्वाचा मतदार संघ आहे. सुशीलकुमार शिंदे येथून तीनवेळा खासदार म्हणून निवडून आले आहेत. शिंदे काँग्रेसच्या मनमोहन सिंग सरकारमध्ये गृहमंत्री होते. ते महाराष्ट्राचे मुख्यमंत्रीही होते. सोलापूर जिल्हा महाराष्ट्रातील प्रमुख पर्यटन स्थळांपैकी एक आहे. त्याला धार्मिक, औद्योगिक आणि व्यावसायिक महत्त्वही आहे. येथे सुती कापडाचा व्यवसाय मोठ्या प्रमाणावर आहे. पंढरपूरचे विठ्ठल मंदिर मोठे पुरातन देवस्थान आहे. या परिसरात पारसनाथ मंदिर, आदिनाथ मंदिर, सिद्धेश्वर मंदिर, मल्लिकार्जुन मंदिर आदी प्राचीन मंदिरे आहेत.

पर्यटन आणि व्यावसायिक केंद्र

सोलापूर हे विडी उद्योग, हातमाग आणि पॉवरलूमसाठीही ओळखले जाते. या भागातून सीना नदी जाते. तिचा इतिहास खूप जुना आहे. हिंदू चालुक्य आणि देवगिरी यादवांनी येथे राज्य केले. येथे मुस्लिम शासकांनी भव्य किल्ले बांधले होते, ज्यांचे अवशेष आजही येथे आहेत. 2019 च्या निवडणुकीत सोलापूर लोकसभा मतदार संघात मतदारांची संख्या 18,516,54 होती. यामध्ये पुरुष मतदार 9,649,98 तर महिला मतदार 8,866,00 इतके होते. काँग्रेस पक्षाने ही जागा 12 वेळा जिंकली.

सोलापूर लोकसभेचा रिझल्ट

या जागेच्या निवडणूक निकालावर नजर टाकली तर 1951  आणि 1957  मध्ये येथे दोन सदस्य निवडून आले होते. 1962 मध्ये काँग्रेसचे मडेप्पा काडादी या जागेवरून खासदार झाले. काँग्रेसचे सुरजतन दमाणी यांनी 1967, 1971  आणि 1977  अशा तीन वेळा येथून निवडणूक जिंकली होती. काँग्रेसचे गंगाधर कुचन 1980 आणि 1984 मध्ये खासदार झाले. 1989 आणि 1991 मध्ये काँग्रेसचे धर्मण्णा सादुल यांनी या जागेवरून निवडणूक जिंकली होती. 1996 च्या निवडणुकीत भारतीय जनता पक्षाने काँग्रेसचा पराभव करून ही जागा काबीज केली. येथून भाजपचे लिंगराज वल्याळ खासदार निवडून आले.

कांग्रेसने सुशीलकुमार शिंदेवर विश्वास दाखविला 

1998 मध्ये काँग्रेस पक्षाने सोलापूर लोकसभा मतदारसंघातून सुशीलकुमार शिंदे यांना उमेदवारी दिली. शिंदे यांनी 1998 आणि 1999 च्या निवडणुका जिंकल्या. 2003 मध्ये ते महाराष्ट्राचे मुख्यमंत्री झाले आणि त्यांनी या खासदारकीचा राजीनामा दिला. येथे झालेल्या पोटनिवडणुकीत भारतीय जनता पक्षाचे उमेदवार प्रतापसिंह मोहिते-पाटील यांनी काँग्रेसच्या उमेदवाराचा पराभव करत विजय मिळवला. 2004 च्या निवडणुकीतही भाजपने या जागेवर आपला विजय कायम ठेवला आणि सुभाष देशमुख खासदार झाले.

2009 च्या निवडणुकीत काँग्रेसचे सुशीलकुमार शिंदे पुन्हा विजयी झाले. 2014 आणि 2019 च्या निवडणुकीत या जागेवर मोदी लाटेचा प्रभाव पडला आणि भाजपने विजय मिळवला. 2014 मध्ये शरद बनसोड खासदार म्हणून निवडून आले, तर 2019 मध्ये जयसिद्धेश्वर स्वामी खासदार म्हणून निवडून आले.